Kreu i PD-së Lulzim Basha ka zhvilluar pasditen e sotme një bashkëbisedim me studentët e Korçës dhe të Shkodrës në çadrën e protestës të ngritur përpara godinës së Kryeministrisë.
Gjatë fjalës së tij, kreu i PD premtoi sërish se do t’u mundësojë studentëve stazh për punësim pas përfundimit të studimeve dhe mbështetje financiare për 1 vit.
“Ne jemi gati të marrim përsipër përgjegjësitë që na takojnë për rininë, për studentët, duke nisur me ligjin e arsimit të lartë. Një ligj i konceptuar si një skemë klienteliste, skemë vjedhje. Janë milionat tuaja, të prindërve tuaj, që në vend të kthehen në studim për ju po kthehen në pasuri për një grup gjakpirësish.
Stazhet janë një koncept evropian. I kam parë me sytë e mi, i kam përjetuar. 70% e studentëve shqiptarë që pasur mundësinë të bëjnë stazh, janë punësuar. Në bazë të meritës së tyre, do të kenë mbështetje financiare për 1 vit që së bashku me sektorin privat t’i japi mundësinë sa më shumë të rinjve të bëhen pjesë e tregut të punës. Ky nuk është një premtim propagande, është një skemë evropiane dhe ju jap fjalën se do ta vëmë në funksion”, theksoi kryetari i PD Lulzim Basha.
Bashkëbisedimi i plotë i Lulzim Bashës me studentët
Vota e lirë do të hapë rrugën për një qeverisje që ndihmon studentët
Kryetari i Partisë Demokratike bashkëbisedon me studentë nga Universitetet publike të gjithë Shqipërisë në Sheshin e Lirisë
– Filialet e universiteteve publike që janë goditur nga kjo qeveri anti-arsim, nga kjo qeveri anti-kulturë, nga kjo qeveri anti-studentore do të rihapen dhe do të financohen plotësisht me fondet e taksapaguesve shqiptarë
– Nuk është ofertë partiake. Eshtë oferta për të gjithë studentët shqiptarë dhe nesër do të jetë realitet. 10 mijë studentë shqiptarë në bazë të meritës së tyre do të kenë nga shteti shqiptar mbështetje financiare për një vit
Pasditen e ditës së gjashtë të protestës studentë nga e gjithë Shqipëria iu bashkuan qëndresës së qytetarëve në Sheshin e Lirisë. Studentë nga Korça, Shkodra, Elbasani, Pogradeci, Durrësi ngritën shqetësimet lidhur me përditshmërinë në sistemin arsimor.
Brikela është një studente e universitetit të Korçës, me banim në Pogradec. Ajo u shpreh se shpenzimet për të udhëtuar drejt Korçës janë sakrificë e prindërve të saj.
“Shpenzimet e shkollimit tim janë një sakrificë e babait tim, i cili gjithashtu ka mbetur pa punë, e kanë hequr. Aftësia e këtij kryeminsitri për të ndihmuar studentët ka mbaruar, pasi nuk ka më cfarë të japë për këtë vend”.
Të tjerë studentë të filialeve të Universiteteve publike në Shqipëri ngritën shpetësimet e tyre jo vetëm lidhur me sistemin arsimor kaotik sipas tyre, por edhe premtimeve të tjera të pambajtura të qeverisë.
Një studente e Universitetit të Korçës, banuese në Devoll iu drejtua godinës së Kryeminsitrisë për të pyetur se ku është ndihma ekonomike për familjet në nevojë.
Kryedemokrati Lulzim Basha iu përgjigj shqetësimeve të studentëve të sjella nga anembanë Shqipërisë në sheshin e qëndresës qytetare. Sipas tij, sistemi i kësaj qeverie i ka shtyrë të rinjtë drejt rrugës së emigrimit duke larguar kështu asetin më të vlefshëm që ka vendi ynë sot: rininë shqiptare.
“Ilaçi për demokracinë janë zgjedhjet e lira dhe të ndershme. Ky është ilaçi për demokracinë që e kthen pushtetin dhe vendimmarrjen tek ju, rinia dhe çdo shqiptar që kërkon të jetojë me djersën e ballit. Ne jemi gati të marrim përsipër përgjegjësitë që na takojnë për rininë, për studentët”.
Premtimet ndaj rinisë ua përsëriti edhe studentëve të Universiteteve publike shqiptare të cilët udhëtojnë nga vendbanimi i tyre drejt qyteteve ku sot gjenden filialet e Universiteteve publike.
“Qindra-mijëra studentë janë goditur sot për shkak të tarifave të larta të studimit, janë goditur sot për shkak të mbylljes së filialeve. Unë dua t’u them se filialet e universiteteve publike që janë goditur nga kjo qeveri anti-arsim, nga kjo qeveri anti-kulturë, nga kjo qeveri anti-studentore do të rihapen dhe do të financohen plotësisht me fondet e taksapaguesve shqiptarë. Këto fonde nuk do të përfundojnë më në xhepat e klientëve të qeverisë, por do të financojnë arsimimin e fëmijëve shqiptarë në universitetet publike me tarifa të ulura, me tarifa të përballueshme dhe me filiale sa më pranë tyre”.
Planin e ndihmës ndaj rinisë studentore, kreu i selisë blu Basha e çon përtej sistemit të arsimit të lartë.
“Stazhet janë një koncept europian. Unë i kam përjetuar gjatë kohës që studioja në Europën Perëndimore, kam parë se si i ndihmojnë studentët si një urë nga shkolla drejt tregut të punës. 70% e studentëve shqiptarë që kanë pasur mundësi të sigurojnë një stazh pune kanë siguruar një vend pune. Ndaj nuk është shpikje, nuk është propagandë, nuk është ofertë partiake. Eshtë oferta për të gjithë studentët shqiptarë dhe nesër do të jetë realitet. 10 mijë studentë shqiptarë në bazë të meritës së tyre do të kenë nga shteti shqiptar mbështetje financiare për një vit”.
Një nga studentët pjesëmarrës e pyeti zotin Basha si ka ndërmend të përmirësojë situatën për studentët të cilët sot po largohen nga vendi i tyre kur Shqipëria është në një gjendje ekonomike si kjo e sotmja e cila ka rënduar çdo familje shqiptare.
Përgjigjen kryetari demokrat Basha e arsyetoi si më poshtë:
“Klima ekonomike në Shqipëri është e rënduar sepse fitimet e shqiptarëve kanë rënë. Taksat janë rritur, çmimet janë rritur, konkurrenca është zeruar. Ky është sistemi që jemi ngritur të shembim këtu në këtë Shesh të Lirisë. Ju keni ardhur të kërkoni të drejtën tuaj për të konkurruar dhe ne do ta garantojmë këtë të drejtë së pari duke sprapsur modelin e së keqes dhe duke u dhënë shqiptarëve dhe rinisë modelin e konkurrencës së lirë. Ekonomia shqiptare do t’i përgjigjet platformës tonë të taksës së sheshtë, të qeverisë e cila nuk qëndron përballë biznesit si xhandar por është në krah të sipërmarrjes për interesin publik, për punësimin”.
Rruga e vetme drejt një Shqipërie me standarde europiane për rininë dhe qytetarët për kryedemokratin Basha është sigurimi i zgjedhjeve të lira dhe të ndershme, që mund të vijnë vetëm përmes një qeverie teknike.
