KOSNPIRACION/ Darka, për çfarë folën Rama me Metën?!

Darka e mbajtur në situatën e tensionuar të protestës së opozitës dhe vetëm dy kate mbi çadrën e ngritur nga PD, duket se ka ngjallur përpos misterit edhe shumë mjegull. E vetmja gjë që dihet me siguri është se palët kanë folur për protestën e PD, zgjedhjet e ardhshme dhe mundësinë e koalicionit në mes tyre.
Por përpos kësaj si Meta dhe Rama të vetmit dëshmitarë të kësaj darke kokë më kokë kanë dhënë versione të ndryshme për dakordësitë ose mosdakordësitë që kanë pasur. Të vetmet burime që Lapsi.al ka arritur të sigurojë janë ato të njerëzve pranë tyre. Pra shkurt versione të bisedës që Meta dhe Rama kanë preferuar të shpërndajnë në publik.
Një burim i afërt me kreun e PS tregoi se darka ka shkuar shumë mirë dhe se midis Metës dhe Ramës nuk ka pasur asnjë divergjencë. Madje të dy kanë rënë dakord se PD dhe Basha nuk përbëjnë rrezik për zgjedhjet e 18 qershorit.
Natyrisht ky version përkon me dëshirën që ka Rama se gjithçka po shkon mbroth dhe se koalicioni nuk ka të çara të mëdha.
Por, nga ana tjetër ai bie ndesh me veprimet konkrete të njerëzve të LSI-së: që nga deklaratat se policia po përgatitet të vjedhë zgjedhjet në qarqe si Durrësi apo Gjirokastra e deri tek ato se njerëzit e Ramës së bashku me ambasadorët e blerë prej tyre po përpiqen të manipulojnë Vettingun.
Pikërisht në këtë sens ka qenë edhe ekspozeja që i ka bërë Meta njerëzve të LSI-së, për darkën e mbrëmshme me Ramën. Sipas një burimi në Kuvendin e Shqipërisë, që kontaktoi Lapsi.al, darka nuk ka shkuar sipas asaj që thotë Rama. Ai tregoi se Meta i ka trajtuar me seriozitet shqetësimet e PD dhe në formë miqësore i ka thënë Ramës: “I’a plotësojmë kërkesat, japim dorëheqjen të dy dhe pastaj futemi së bashku në një palë zgjedhje ku e kemi të sigurtë fitoren”.
Pra varianti që Meta u ka thënë njerëzve të tij, pranon disa nga kërkesat e PD, dhe mbi të gjitha versionin e qeverisë teknike.
Po cili është version i vërtetë? Çfarë kanë biseduar konkretisht dy krerët e koalicionit të majtë? Kjo ende nuk dihet. Ne tani për tani njohim vetëm versionet që ata kanë dashur ti rrëfejnë mbështetësve të tyre që duan ti mbajnë të karikuar.