Ish ministri i Drejtësisë Ylli Manjani ka postuar sot në Facebook një status ku ai thotë se lajmi që Gjykata e Strasburgut ka vendosur dëmshpërblim sipas tij të rëndë për financat është lajm i keq. Kjo ka të bëjë më ligjin e ri të trajtimit të pronave ku Kushtetuesja ka pranuar që formula e kompensimit është e drejtë dhe lejon kthimin fizik të pronës së lirë tek pronarët. Sipas tij qeveria është e paqartë. Ai akuzon Avokaturën e Shtetit që sipas tij ka për qëllim që të merret studioja e gruas së Tony Blair që të na mbrojë në Strasburg.
POSTIMI i Manjanit:
Përshëndetje,
Lajmi që Gjykata e Strassbourg ka vendosur dëmshpërblim të rëndë për financat tona publike, nuk është aspak i mirë. Këto çështje në fakt ishin shqyrtuar nga kjo gjykatë që vjet në mars, nderkohë që Gjykata jonë Kushtetuese kishte çelur gjykimin per kushtetuetshmërinë e ligjit te ri per Trajtimin e Pronës.
Gjykata Kushtetuese ka pranuar përfundimisht që formula e kompensimit financiar është plotesisht kushtetuese dhe e drejtë. Gjithashtu Gjykata shfuqizoi dy paragrafë që i hap rrugë kthimit fizik te pronës së lirë për të gjithë ato kërkesa që janë të patrajtuar ende nga Agjensia e Trajtimit të Pronës (ATP). Vlerësoj se Gjykata Kushtetuese korrektoi një gabim domethënës, pra të lejimit te kthimit të pronës së lirë pronarit të saj.
Qeveria, jo të gjitha agjensitë e saj, është ende e paqartë mbi strategjinë që do ndjekë pas këtij vendimi. Pra pyetja që ngrihet është: do të zbatohet vendimi i Gjykatës Kushtetuese për kthimimin fizik te pronës pronarëve apo jo? Nëse po, në ç’masë?
Mbi këtë bazë do të duhet të mbahet edhe qëndrimi zyrtar i shtetit përpara Gjykatës së Strasbourg, e cila do të shqyrtojë këtë ligj tonin nëpërmjet shqyrtimit të një ose dy çështjeve nga lista e gjatë e aplikantëve atje. Por ndërkohë ende qeveria nuk ka një qëndrim mbi pyetjet që janë ngritur tashmë.
Sigurisht kjo situatë kaotike (pa shkak të arësyeshëm) shfrytëzohet më së miri nga avokatët dhe Gjykata e Strassbourg vazhdon të ndëshkojë Shqipërinë, ndonëse ende me çështje të vjetra.
Avokatura e Shtetit tonë është në fakt pjesë e problemit dhe jo e zgjidhjes. Interpretimet e saj për këtë situatë janë të gabuara dhe me qëllime të paqarta. Kërkesat e saj të vetme janë të merret studio ligjore e gruas së Tony Blair që të na mbrojë në Strassbourg. Kërkesa këto të rrëzuara sistematikisht nga Ministri i Drejtësisë si të pamotivuara nga ligji.
Kujtoj se për këtë çështje kisha propozuar një VKM që e zgjidhte një herë e mirë përzgjedhjen e studiove të avokatisë. Ky projekt fle ende në zyrën e Sekretarit të Përgjithshëm të Këshillit të Ministrave. Qartësisht ky është zyrtari që mbron Avokaten aktuale të Shtetit dhe nxit përzgjedhjen selektive të studiove private. Kjo ishte në fakt arësyeja përse i refuzova të gjitha propozimet për përzgjedhje studiosh pa tender dhe kuturu.
Tani qeveria duhet të mbledhë mendjen dhe të kthejë pronarëve pronat e lira, ashtu siç urdhëron në fakt Gjykata Kushtetuese! Sa më shpejt ta bëjë këtë gjë aq më e mirë do jetë zgjidhja e kësaj çështje ngërç për shoqërinë, financat e shtetit dhe ekonomisë kombëtare.
Gjithnjë kam mbështetur pikpamjen e kthimit fizik të pronës së lirë. Vetëm kjo në fakt është rivendosje reale e të drejtës së cënuar. Kompensimi financiar duhet të ishte mjet i jashtëzakonshëm dhe i drejtë sipas formulës që ka ligji i ri tashmë, që zbatohet në kushtet kur prona është e zënë faktikisht dhe jo kur pritet të zihet nga zabtuesit e rinj (qofshin këta edhe me leje ndërtimi).
Shoqëria nuk mund të paguajë para për kompensim kur prona është e lirë. Është absurd qëndrimi i Kryeministrit që të mos kthehet prona e lirë pronarit se medemek kjo iu dashka dhënë sipërmarrësve për fshatra turistikë! Nga ana tjetër edhe më absurde bëhet padrejtësia kur me leje legalizimi qeveria vlerëson vetëm zabtuesit e pronës së tjetrit.
Prandaj duhet sa me shpejt të zbatohet vendimi që prona e lirë ti kthehet pronarit. Në shumicën e rasteve rezulton se ky kthim është 100% ose afërsisht aq. Nuk kemi pse të hezitojmë për të vënë në vend një padrejtësi që rëndon financiarisht shumë breza.
Këtë qëndrim pret dhe Strassbourg-u dhe nuk besoj se ka nevojë për studio avokatie private për të spjeguar kaq thjeshtë këtë gjë!
Në të kundërt vetëm do shtohet fatura financiare, të cilën askush nuk ja ka borxh sot e në të ardhmen shtetit që qeveriset keq!
