Presidenti i Republikës Bujar Nishani, ka konfirmuar zyrtarisht thirrjen e Këshillit të Sigurisë Kombëtare.
Ka qenë drejtori i Kabinetit të Presidentit, Ols Lafe, i cili në një dalje para medieve, ka njoftuar “se Presidenti do të thërrasë Këshillin e Sigurisë Kombëtare. Për datën dhe orën do të ketë një njoftim tjetër”, u shpreh Lafe.
Ky konfirmim i Presidentit, vjen pas një kërkese zyrtare që Kryetari i Kuvendit Ilir Meta, i adresoi kreut të Shtetit, për mbledhjen e këtij këshilli, me objekt diskutimi, mosarrestimin e shumë të kërkuarit për trafik ndërkombëtar droge, Klemend Balili.
Deklarata plotë për shtyp e Institucionit të Presidentit të Republikës
Kryetari i Kuvendit të Shqipërisë, Sh. T. Z Ilir Meta, në cilësinë e anëtarit të Këshillit të Sigurimit Kombëtar (KSK) i është drejtuar Presidentit të Republikës, SH. T. Z. Bujar Nishani për thirrjen në një kohë sa më të shpejtë të mbledhjes së Këshillit të Sigurimit Kombëtar, për çështjen “Balili”.
Kjo kërkesë vlerësohet serioze, pasi ajo paraqitet nga Kryetari i Kuvendit të Shqipërisë, si dhe për shkak të problematikave që parashtrohen, të cilat kanë të bëjnë me:
– Rrezikshmërinë e lartë shoqërore të shtetasit Klement Balili, përcjellë nga organet kompetente shqiptare apo ndërkombëtare.
– Shqetësimin e partnerëve tanë të SHBA dhe të tjerë ndërkombëtarë, të cilët paraqesin rezerva në drejtim të punës së organeve tona përgjegjëse për shkak të mosndalimit të tij në kohë dhe zbatimit të detyrimeve të përcaktuara në akte ndërkombëtare dhe legjislacioni vendas.
– Si dhe rrezikut që egziston, tashmë, nga mosveprimi i agjencive ligjzbatuese të vendit tonë, në drejtim të goditjes ndaj krimit të organizuar, trafiqeve të paligjshme apo dhe bazave të tyre që mund të kontrollohen nga njerëz të politikës dhe shtetit.
Për këto arsye Presidenti i Republikës në cilësinë e Kryetarit të Këshillit të Sigurimit Kombëtar ka vendosur të thërrasë mbledhjen e Këshillit me qëllim dëgjimin e të gjitha argumenteve të parashtruara në kërkesë si dhe duke i analizuar dhe duke këshilluar me të gjithë anëtarët e Këshillit.
Për datën dhe orën e mbajtjes së mbledhjes do të njoftoheni në ditët në vazhdim.
