Konfirmohet zyrtarisht shifra që do të paguajën të gjithë shoferët e veturave në rrugën e Kombit.
I ftuar në “Tonight Ilva Tare”, ministri i Transporteve dhe Infrastrukturës, Sokol Dervishaj tha se tarifa do të jetë rreth 5 euro. Sipas tij tarifa është vendosur pas konsultave me IFC-në, e cila propozoi një shumë më të lartë.
Sipas ministrit, pagesa bëhet për mirëmbajtjen e rrugës, ndërsa shtoi se tarifa do të vendoset pas përfundimit të dokumentacionit.
Kompania turke, Vendeka Bilgi, fituese e tenderit në fjalë, ka premtuar një investim kapital në shumën 50,6 milionë euro si dhe një investim në vazhdimësi në mirëmbajtje dhe operim të rrugës në shumën 320,6 milionë euro, rreth 110 milion euro me shumë se ofertuesi tjetër.
Tarifimi i “Rrugës së Kombit” shkaktoi protesta nga qytetarë të zonave që përshkron për shkak se rriste koston e udhëtimit të tyre, një prej përfitimeve që ata kishin me ndërtimin e kësaj rruge.
