Kryetari i PD-së, Lulzim Basha ka përcaktuar edhe datën kur përpilimi i listave me propozime për kandidatë për deputetë të opozitës do të mbyllet. Bëhet fjalë për propozimet që do të mblidhen nga strukturat e PD-së, se qytetarë dhe anëtarë të PD mund të propozojnë emra apo të diskutojnë rreth emrave në aplikacionin e ngritur për këtë qëllim tek pd.al.
“Pra, me të gjithë Shqipërinë, për një proçes sa më të hapur të evidentimit të njerëzve që gëzojnë respektin dhe reputacionin e panjollosur në komunitet, kapacitetet morale dhe profesionale për të përfaqësuar vlerat dhe idealet e larta me të cilat ka lindur kjo parti dhe për të cilat qëndron kjo parti.
Që proçesi të jetë sa më i hapur, përveç rrugës statutore që do të ndiqet sipas përcaktimit në statut, dhe kjo do të monitorohet – jo për fasadë se partinë e fasadës e kemi në anën tjetër të bulevardit – por që në të vërtetë çdokujt t’i jepet mundësia për të propozuar, për të dhënë mendimin e tij për kandidatët e mundshëm të Partisë Demokratike, kjo mundësi do të ekzistojë edhe drejtpërdrejt për anëtarësinë e Partisë Demokratike dhe për çdo qytetar përmes një aplikacioni të posaçëm në faqen e Partisë Demokratike online, tek pd.al.
Ky proçes duhet të përfundojë, përsa i përket strukturës, brenda datës 5 Shkurt.”, deklaroi Basha në mbledhjen e sotme të kryesisë.
