Deputeti i Partisë Socialiste Vladimir Kosta, ka reaguar menjëherë pas deklaratave të dy eksponentëve të lartë të LSI-së, e ministrit të Drejtësisë Ylli Manjani dhe deputetes Silva Caka të cilët kanë kërkuar që forca e tyre politike, të dalë e vetme në zgjedhjet e ardhshme.
Edhe pse disa muaj më parë deputeti Kosta shpërtheu kundër kryeministrit Rama dhe udhëheqjes së PS-së duke deklaruar fillimisht edhe largimin nga grupi i tyre parlamentar, duket se ai i ka rregulluar punët me kryetarin dhe madje, po flet edhe në emër të partisë.
Kështu në një postim në faqen e tij në Facebook, ai ka shpërthyer kundër LSI-së duke marrë shkas nga deklaratat e Manjanit dhe Cakës, dhe hedhur sfidën, që po tja mbajë le të dalë e vetme në zgjedhjet e ardhshme.
Postimi i plotë i deputetit Vladimir Kosta:
Ministri i Drejtësisë dhe një kolege e LSI nuk e fshehin se nuk janë komod me koalicionin me PS. Shumë nga arsyet që japin, përveç tyre, nuk i kupton asnjë i majtë në vend.
Kjo loja e tipit jemi dhe s’jemi aleatë vetëm sa po çorienton elektoratin e majtë. Më shumë ngjan si rritje pazari sesa sjellje mes partnerësh politike.
Mbase është koha që LSI ta provoj veten sa vlen e vetme në zgjedhje… Duhet ta respektojmë këtë dëshirë të tyre.
