MOTI/ Ja çfarë temperaturash rezervohen për javën e ardhshme

Që nga dita e premte vendi ynë u përfshi nga një mot i acartë i paparë prej vitesh, duke nisur edhe nga temperaturat deri në -20 gradë celsius që kanë paralizuar pothuajse të gjithë vendin. Reshjet e dëborës si rrallë ndonjëherë nuk kursyen as Shqipërinë e Mesme, borë të cilën Durrësi, Kavaja e Lushnja nuk e shihnin prej 7 vitesh. Si pasojë e të ftohtit por edhe epidemisë së gripit u mbyllën kopshtet, shkollat dhe universitetet për 2 javë, por ajo që iu intereson më shumë njerëzve është të dinë kur do marrë fund i ftohti polar, dhe kur do të mund të dalin lirshëm nga shtëpitë e tyre.
Sipas meteorologes Lajda Porja, përmirësim të motit do të ketë duke nisur nga e hëna, ku temperaturat do të rriten me 3 deri në 4 gradë. Për Tiranën dhe Ultësirën Perëndimore ndryshimi do të ndjehet ditën e Mërkurë, nga minus do të shkojnë në 1 gradë celsius.
“Sikundër edhe dita e djeshme, edhe sot, janë dy ditët më të ftohta deri më tani të shënuara për stinën e dimrit. Temperaturat megjithëse rritën të hënën dhe të martën, do jetë një rritje e lehtë dhe jo shumë e ndjeshme. Rritja më e ndjeshme do të fillojë nga dita e Mërkurë dhe deri në fundjavë duke bërë që fundjava e ardhshme të bëhet më e qëndrueshme, pra të shkojë në vlerat e tyre tipike”, tha Porja.
Sipas Porjas, deri në 12 janar parashikohet që reshje të mos ketë, por ngricat do të jenë prezente deri në mesin e janarit dhe problematike paraqitet verilindja e vendit, aty ku edhe temperaturat janë më të ulëta.