EMRI/ Kapshticë, drogë në serbatorin e makinës, arrestohet shoferi nga Yzberishti

Policia Kufitare e Kapshticës ka zbuluar një sasi prej 10 kg lënde narkotike në një makinë që udhëtonte drejt Greqisë.
Sipas të dhënave të Policisë, droga ishte fshehur  në mënyrë mjaft të sofistikuar. Boçet e kanabisit ishin futur në shishe plastike brenda serbatorit të benzinës. Plot 34 boçe janë sekuestruar nga policia dhe ka arrestuar drejtuesin e mjetit.
Drejtuesi i mjetit është vënë në pranga pasi akuzohet për trafik droge.
Sipas policisë, në pranga është vënë Dorjan Braho, 38 vjeç, banues në Yzberisht, Tiranë.
Policia sqaron zyrtarisht se arrestimi i tij është bërë sepse gjatë kontrollit të ushtruar në vijën e dytë (në dalje të Republikës së Shqipërisë) nga shërbimet e Policisë Kufitare duke përdorur kamerën fibroskop në mjetin në pronësi të tij tip “Volksvagen” me targa AA 904 PB, në pjesën e serbatorit, u evidentuan dhe sekuestruan me cilësinë e provës materiale 34 shishe plastike të mbushura me lëndë të dyshuar si kanabis me peshë rreth 10 kg.
Dorjan Braho u arrestua në kushtet e flagrancës ndërsa materialet hetimore i kaluan Prokurorisë të Krimeve të Rënda në Tiranë, për veprën penale, “Trafikimi i narkotikëve, mbetur në tentativë”.