EMRI & FOTO/ Ushtria shqiptare e NATO-s, për herë të parë me një Gjenerale femër

Manushaqe Shehu është e para femër që gradohet Gjenerale në historinë 104-vjeçare të Forcave të Armatosura të Shqipërisë. Shehu është dekoruar me gradën gjeneral brigade nga kreu i shtetit Bujar Nishani.
Gjeneralja 51-vjeçare nga Peshkopia ka marrë titullin oficere në vitin 1984, dhe në karrierën e saj prej 32 vitesh në uniformë ka shërbyer në disa detyra dhe funksione. Shehu përfundoi në 1984 studimet në Akademinë e Lartë të Oficerëve në Tiranë, dhe u emërua shefe logjistike në Brigadën e Peshkopisë. Ndërkohë në vitet1989-1994 përfundoi fakultetin e drejtësisë në Shkodër.
Në vitin 1991 merr gradën kapiten i Parë. Që nga fillimet e karrierës së saj  ushtarake deri në vitin 2000 ka punuar në detyra të ndryshme në fushën e logjistikës, financës etj. Gjatë viteve 2000-2002 punon në ekipin amerikan të Departamentit të Mbrojtjes të USA, pranë MM, si përkthyese, njëkohësisht kryen studime pasuniversitare (Kursin Themelor të Oficerit në Shtab), në Akademinë e Mbrojtjes, Tiranë.
Në vitin 2003 merr gradën major. Gjatë kësaj periudhe, ka qenë nismëtare e disa projekteve për ristrukturimin e FA dhe anëtare e bordit të kompanisë Amerikane SAIC për ndryshimin e strukturave të FA, si dhe anëtare e bordeve drejtuese të ndryshimit të disa rregulloreve të logjistikës në FA.
Ne vitin 2004-2005, përfundon shkollën logjistike ADAMS P&P në Francë si dhe Akademinë e Shtabit të Përgjithshëm Spiro Moisiu në Tiranë.
Në vitin 2006 merr gradën nënkolonel. Nga 2007 deri në vitin 2011 ka asistuar ish-presidentin e RSH Bamir Topi në pozicionin e këshilltarit për sigurinë.
Gjatë kësaj periudhe përfundon studimet në Kolegjin e Lartë Rajonal të Sigurisë dhe të Mbrojtjes, Tiranë.
Është autore e disa botimeve si dhe ka marrë pjesë në kurse dhe trajnime në vende të aleancës dhe partnere.
Në vitin 2010 përfundon Masterin Shkencor MND në fushën Sigurisë Kombëtare dhe po në këtë vit merr gradën kolonel.
Gjatë karrierës së saj Manushaqe Shehu është dekoruar me urdhra e medalje të ndryshme nga ministri i Mbrojtjes dhe Shtabi i Përgjithshëm.
Ajo është pjesëmarrëse në stërvitje të përbashkëta me vende anëtare të NATO-s dhe po ashtu aktiviste dhe drejtuese e nismave në ndihmë të grave ushtarake dhe civile të FA dhe të rajonit.
Me 2012  emërohet drejtoreshë në Shtabin e Përgjithshëm.
Që prej 1 nëntorit të këtij viti është komandante e Akademisë së Nënoficerëve, detyrë të cilën vijon ta ushtrojë.