VIDEO/ Puseta e harruar hapur nga Erion Veliaj “thith” një qytetar, ambulanca vonohet – i plagosuri 30 minuta nën shi

“Aksioni” i parë, sapo Erion Veliaj hipi në fronin e kryebashkiakut të Tiranës, ishte pastrimi dhe mbyllja e pusetave. Fotot “artistike” të pusetave të pastruar e të mbyllura, mbushën rrjetet sociale.
Por, pas një viti, shiu i radhës, në përmbytjen e radhës, mundëson një incident, ku një person bie në puset, humbet ndjenjat dhe mes shiut detyrohet të prese për 30 minuta edhe autoambulancën e urgjencës së Ilir Beqajt.
Incident i rëndë ka ndodhur sot në mbrëmje në kryeqytet, me protagonist një qytetar, gjendja e të cilit nuk dihet se si është.
NismaThurje ka publikuar mesazhin e një qytetari tjetër i cili ka rrëfyer se një burrë ka rënë në puset tek stacioni i fundit i Kombinatit duke u dëmtuar rëndë por ka mbetur për 30 minuta në shi.
Në videon e publikuar, burri duke i shtrirë në tokë ndërsa shiu bie litar. Ai kishte humbur dhe ndjenjat por sipas denoncuesit, ambulanca nuk ka ardhur fare, ndërsa Policia ka shkuar pas 15 minutash.
“Nisma përshëndetje. Ju lutem shpërndajeni këtë video tmerri. Ky personi ishte te stacioni i fundit i kombinatit. U pengua te puseta e hapur dhe ra duke u dëmtuar rende. More policinë dhe ambulancën dhe erdhi mbas 15 min policia. Edhe policia komunikonte për një ambulance por ajo nuk vinte. Mbeti i shkreti gjysme ore ne shi i shtrire. Uroj t’ia ketë dale. Kujdes njerëz ruajuni se për këtë shtet keni vdekur po rate ne pusetat e leshit”, shkruan denoncuesi.
Ndërkohë, kryeqyteti është përfshirë nga moti i keq, me erë të fortë dhe reshje shiu. Reshjet e dendura dhe stuhia kanë shkaktuar probleme në rrugë dhe në disa lagje të Tiranës. Përmbytje ka pasur në zonën e Misto Mames, në Don Bosko, te Komuna e Parisit dhe tek Rruga e Kavajës.
Ndërsa në rrugën e Elbasanit ka pasur edhe shumë pemë të thyera si pasojë e erës së fortë.
Probleme janë krijuar edhe tek “Pallatet Çabej”, ku janë përmbytur garazhet e makinave në disa pallate.
Vranësirat dhe shirat që nisën këtë javë do të vijojnë edhe për ditët e ardhshme. Sipas parashikimeve të Institutit të Gjeoshkencave do të mbizotërojë mot me vranësira të çrregullta dhe shira lokalë të herëpashershëm, në disa zona të vendit.