MASHTRIMI/ Zbulohet neni që lejon importin e plehrave për djegie

Ligji për importin e mbetjeve nuk lejon vetëm ato për riciklim, por edhe plehrat që do të përdoren për djegie, në incineratorët që po ngrihen në Fier e Manëz të Durrësit.
Neni 48/1 e ligjëron këtë, në mënyrë të kamufluar. Aleanca Kundër Importit të Plehrave, që sot zhvillon një protestë masive para kryeministrisë, ka zbuluar se në mënyrë të fshehtë, ky u hap rrugë tonelatave me plehra për t’u asgjësuar në Shqipëri.
“për qëllime riciklimi dhe përdorimi si zëvendësues, të lëndëve të tjera nga burime jo të rinovueshme, që përdoren nga industria”, thuhet në këtë nen.
AKIP sqaron se lëndë të para jot ë rinovueshme janë nafta, gazi, benzina, etj.
“Pra nën petkun e prodhimit të energjisë për këto industri etj, përdorim plehrat e importit që në fakt është ‘asgjësim’ i këtyre mbetjeve. Asgjësimi është faza e fundit e procesit të menaxhimit të mbetjeve, vijon AKIP, duke sqaruar se,
 ky asgjësim bëhet nëpërmjet, avullimit, djegies, kalcifikimit, groposjes, derdhjes në det, depozitimit në fund të detit e të tjerë procese për të cilat Shqipëria nuk ka kapacitete natyrore dhe teknologjike, përpos ndotjes masive që mbizotëron anembanë vendit”.
Ky nen zhbën kështu përbetimet e kryeministrit Rama se ligji nuk lejon importin e plehrave për asgjësim. Ai vërteton dyshimet se pas miratimit të ligjit nuk qëndron vetëm interesi i industrisë së riciklimit, por interesa të tjera financiare, apo edhe mafioze, sic shprehen ambientalistë, analistë, media e shoqëria civile.
Mafia e plehrave, ashtu siç deklaronte Edi Rama në parlament në tetor të vitit 2013 kur e hoqi ligjin, kërkon terrene të reja për t’i përdorur për djegien apo groposjen e miliona tonelatave mbetje urbane. Të paktën 5 milionë tonë plehra të Italisë u refuzuan nga Maroku dhe janë në pritje të gjetjes së një vendi tjetër për t’u djegur, groposur apo asgjësuar në forma të tjera. /Lapsi.al/