“Nëse nuk mund t’i bindësh, të paktën hutoji ata”, ishte një nga motot e presidenti të 33-të të SHBA-së, Harry Truman.
Kjo shprehje u analizua më pas nga analistët e teknikës së oratorisë, si taktikë e ndjekur nga Adolf Hitler gjatë pushtimit nazist.
Dalja e sotme e kryeministrit të Shqipërisë, dy orë a më shumë në televizion, për të bindur shqiptarët se plehrat nuk janë të dëmshme, duket se nuk sqaroi asgjë, madje i hutoi edhe më keq ata.
Duhet falënderuar gjiganti Google, aty mund të informohesh më mirë dhe më me vërtetësi.
Duke pritur analizën e ekspertëve përkatës të kësaj teme, një kërkim i thjeshtë në legjislacion e Bashkimit Evropian, të vë përballë një realiteti të trishtë.
Shqipëria, vendi i cili nuk është as afër të qenit vend aspirant për t’iu bashkuar standardeve të BE-së në zbatimin e legjislacionit, ndodhet në situatë dramatike për sa i përket plotësimit të kushteve për lejimin e futjes në territorin e saj, të plehrave apo mbetjeve siç dëshiron ti quajë kryeministri.
Çfarë thuhet në faqen on-line të Komisionit Europian, dhe ku është Shqipëria vite dritë larg zbatimit të kritereve të cilat mbrojnë jetën e qytetarëve europianë?
1. Ndotja e ajrit nga transporti
Automjetet të cilat transportojnë mbetje në vendet e Bashkimit Europian, duhet të zbatojnë standardet e qarkullimit rrugor, duke filluar nga vjetërsia e automjetit, parandalimi i lëshimeve të grimcave të dëmshme të karburantit e deri tek siguria e paketimit të plehrave dhe elementeve të rrezikshme për jetën e komunitetit.
2. Politika e BE-së për mjedisin urban
Për katër vitet e ardhshme, pjesa më e madhe e vendeve të BE-së do të ndjekin politikën e përmirësimit të planifikimit urban dhe dizajnimin e rrugëve nga duhet të kalojnë këto mbetje. Një standard ky që as nuk shihet në ëndërr në rrugët e Shqipërisë.
3. Ajri
Ndotja e ajrit ka qenë një nga shqetësimet kryesore të politikave mjedisore Bashkimit Evropian që nga fundi i 1970. Për sa i përket riciklimit, Komisioni ka paraqitur një Paketë Politikash për cilësinë e ajrit në vitin 2013, duke përfshirë edhe propozimet legjislative që janë aktualisht duke u shqyrtuar nga Parlamenti Evropian dhe Këshilli. Ndërkohë ekspertët thonë se Shqipëria është një prej vendeve me ndotjen më të lartë në Europë, sidomos në vendet urbane. Çfarë do të ndodhte në territorin e vendit tonë, pas ardhjes së mijërave ton plehra? E sigurt se fëmijëve tanë do ‘u rrezikohet seriozisht shëndeti.
4. Aksidentet në industri
Aksidentet e mëdha industriale që përfshijnë kimikatet e rrezikshme përbëjnë një kërcënim të rëndësishëm për njerëzit dhe mjedisin, thuhet në faqen zyrtare të Komisionit Europian. Për më tepër aksidente të tilla shkaktojnë humbje të mëdha ekonomike. Përdorimi i sasive të mëdha të kimikateve të rrezikshme është e pashmangshme në disa sektorë të industrisë të cilat janë jetike për një shoqëri moderne e industrializuar. Për të minimizuar rreziqet, masat janë të nevojshme për të parandaluar aksidentet e mëdha dhe për të siguruar gatishmërinë dhe reagimin. Por, sa mund ta parandalojë këtë qeveria e Ramës? Gati e pamundur!
Duke marrë shkas nga këta elementë, duket gati e pamundur që kryeministri të na bindë se Shqipëria është një bahçe me lule dhe fanar ndriçues. Shqipëria jonë e vogël e kërrusur nga varfëria, përçudnimi i shkaktuar nga korrupsioni, vrasjet në vendet e punës, për shkak të pasigurisë dhe aferave korruptive, nuk ka më fuqi të mbajë në kurriz plehrat që kërkon t’i ngarkojë Rilindja.
Më datë 1 tetor do të jem në protestë, në orën 11.00, përpara Kryeministrisë, për të kundërshtuar me forcë ardhjen e plehrave, ashtu si për armët kimike.
