Ministri i Jashtëm, Ditmir Bushati është “i përzgjedhuri” për të joshur aleatin Ilir Meta. Mos marrjet e garancive se në zgjedhjet e vitit 2017, LSI do të jetë në koalicion me PS, Edi Rama i ka dërguar një “ofertë” të re Ilir Metës. Për këtë ka ngarkuar Ditmir Bushatin për “ta promovuar” Ilir Metën si një kandidat të fortë për President.
I ftuar në emisionin “Debati” në TV “Channel One”, të gazetarit Roland Qafoku, Bushati e vlerësoi metën edhe si një një nga ministrat e Jashtëm më të mirë që ka pasur Shqipëria. Ai u shpreh se kandidimi i Metës do të varet nga koalicioni dhe votat që janë në Parlament. “A mund të jetë kandidat, natyrisht që është kandidat i fortë për President”, u shpreh Bushati në emision.
Ministri ka mohuar atë që është shkruar në media se gjatë kohës kur ishte në opozitë ka dërguar informacione që e lidhin Ilir Metën me aktivitete të paligjshme në kancelaritë perëndimore.
Pjesë nga intervista
Më vjen mirë që i referoheni zotit Meta. Si janë marrëdhëniet tuaja me të?
Siç kanë qenë gjithmonë që nga koha kur e kam njohur, marrëdhënie korrekte shumë të mira.
Si u përgjigjeni ju zërave që kanë qarkulluar edhe në media që ju si ministër i Jashtëm keni folur keq për kryetarin e Kuvendit përballë diplomatëve të huaj?
Këto nuk janë zëra, por thashetheme, edhe mediat ndahen në media serioze dhe portale, në të cilat gjen turli kombinacionesh, por nuk e merr vesh se kush e shkruan diçka. Ky është një thashethem dashakeq. Por Meta ka eksperiencë të gjatë politike, ka qenë dy herë ministër i Jashtëm, e di shumë mirë se çfarë ndodh, si funksionon shërbimi.
Keni miqësi me zotin Meta?
Patjetër.
A mund të jetë Presidenti i Shqipërisë në vitin 2017?
A mund të jetë kandidat, natyrisht që është kandidat i fortë për President, por kjo varet nga Meta, nga koalicioni, nga votat në Parlament. Një njeri që ka qenë Kryeministër, ministër i Jashtëm, ministër i Ekonomisë, kryetar Parlamenti, kur lexon CV dhe sheh kontributin, ai është një kandidat i fortë për President, por mendoj që politika shqiptare nuk është tek emri. Fillimisht duhet të ketë një diskutim se çfarë profili duhet ta kemi Presidentin e Republikës.
Po nëse Presidenti shpall zgjedhjet më përpara?
Besoj se Kushtetuta është e qartë në këtë pikë. I takon këtij Parlamenti të zgjedhë Presidentin e Republikës.
