Ministria e Financave ka reguar pas zemërimit të qytetarëve për vendosjen e taksës mbi blerjet individuale online i cili ka shtuar edhe rradhët tek Posta Shqipëtare duke sjellë aty njerëz nga gjithë Shqipëria.
Sipas ministrisë së Financave vendimi përafron Shqipërinë me standardin e BE dhe rajonit ndërkohë që vendos procedura doganore më të thjeshtuara për qytetarët.
Në fund të korrikut u ndryshua kufiri i pataksueshëm në doganë për dërgesat e mallrave me karakter jotregtar, të cilat kanë një vlerë të papërfillshme të përcaktuar në vendim, përkatësisht për blerjet online nga interneti në masën 22 Euro dhe për dërgesat nga një individ jashtë Shqipërisë pranë një individi në territorin shqiptar në masën 45 Euro.
VKM ka hyrë në fuqi pas publikimit në Fletoren Zyrtare në datën 3 Gusht 2016 dhe nuk ka fuqi prapavepruese, saktëson Ministria e Financave.
Në zbatim të këtij parimi si dhe për të evituar informalitetin në rastet kur dërgesat e tilla përdoren edhe për qëllime tregtare, të gjitha vendet e BE dhe rajonit kanë standardizuar rregullin duke rishikuar kufirin në jo më shumë se 22 euro.
Në tabelën më poshtë renditen të gjitha vendet anëtare të BE dhe kufiri përkatës (në rastet e vendeve me monedha të ndryshme, i ekuivalentuar në euro) ku shihet shumë qartë se edhe vendi ynë e ka harmonizuar këtë kufi me të gjithë vendet e tjera të BE dhe të rajonit.
Kufiri i pataksueshem (ekuivalent me monedhen vendase) për disa vende europiane
Austria 22 euro
Belgjika 22 euro
Bullgaria ~15.34 euro
Kroacia ~ 20.85 euro
Qipro 17 euro
Republike Ceke 22 euro
Danimarka ~10.75 euro
Estonia 22 euro
Finlanda 22 euro
Franca 22 euro
Gjermania 22 euro
Greqia 22 euro
Hungaria ~18.82 euro
Irlanda 22 euro
Italia 22 euro
Letonia 22 euro
Lituania ~21.72 euro
Luksemburgu 22 euro
Malta 22 euro
Hollanda 22 euro
Polonia 22 euro
Portugalia 22 euro
Rumania 10 euro
Spanja 22 euro
Sllovakia 22 euro
Sllovenia 22 euro
Suedi 22 euro
Mbreteria e
Bashkuar ~19.23 euro
Rajoni
Kosova 22 euro
Maqedonia 22 euro
Por lidhur me procedurat kuptohet qartë se vendimi i ministrisë ka dalë pa qartësuar raportet mes doganave dhe Postës Shqiptare apo postave të tjera private që operojnë në Shqipëri duke bërë që rradhët tek posta Shqiptare të rriten dhe njerëzit të sorollaten sa nga Posta te dogana.
“Në sqarim të qytetarëve lidhur me procedurën që do të ndiqet në vijim, Drejtoria e Përgjithshme e Doganave në bashkëpunim dhe koordinim me Postën Shqiptare po zbardhin procedurat me qëllim thjeshtësimin e tyre në favor të qytetarëve. Kështu, Posta shqiptare do t’u mundësojë qytetarëve plotësimin e deklaratës doganore elektronikisht dhe arkëtimin e detyrimit doganor. Qytetarët mund ta kryejnë procedurën e zhdoganimit, pagesën dhe tërheqjen e objekteve postare pranë zyrave postare në qytetet ku ata banojnë” thekson njoftimi i Ministrisë së Financave.
Një fluks i madh qytetarësh ndodhen këto ditë në zyrën transit të Postës Shqiptare në Tiranë ku mund të kryejnë zhdoganimin.
Për të marrë një pako atyre ju duhet të presin në radhë për orë të tëra dhe orari zyrtar i përfaqësuesit të doganës është 9 me 11.
“Për të gjithë Shqipërinë ishte lënë në dispozicion një birucë në Kinostudio, ku jashtë saj mund të ishin rreth 50 persona nga e gjithë Shqipëria”, shprehet Estela Ujka, blogere.
Posta Shqiptare ka sqaruar sot përmes medieve se qytetarët mund të kryejnë pagesën doganore në zyrat e postës në qytetet nga janë, ku edhe atje do të krijohet rradhë.
“Për t’i ardhur në ndihmë qytetarëve, kryesisht atyre që vijnë në Tiranë nga rrethet, Posta Shqiptare do t’i japë atyre të kryejnë pagesën e detyrimit doganor edhe pranë zyrës postare në qytetin ku ata banojnë”, thotë Dritan Caka, këshilltar juridik pranë Postës Shqiptare për topchannel.
