EMRAT/ Britani, dy burrelsa më të kërkuarit, i fshihen drejtësisë shqiptare

Britanikja “Daily Mail” i ka kushtuar një artikull fenomenit sipas saj në rritje të shume shqiptareve me precedentë kriminale, qe  i fshihen drejtësisë se vendit te tyre, duke qëndruar nën identitete të rreme në Britaninë e Madhe.
Historia e Saliman Barçit ka ngjallur së tepërmi interesin e mediave britanike, pasi u bë publike se shqiptari që ka përfituar azil në Britaninë e Madhe, kërkohet në Shqipëri për dy vrasje të bëra në vitin 1997.
Prestigjiozja “Daily Mail”, në një tjetër artikull shkruan se përveç Barçit, ekziston frika se në Angli fshihen edhe të tjerë shqiptarë që janë të kërkuar për vrasje. Tabloidi britanik ka pyetur në lidhje me këtë çështje Teno Hodajn, një zyrtar i lartë i Interpol Tiranës, i cili i tha për “Daily Mail” se janë të paktën 6 shqiptarë të akuzuar për vrasje që jetojnë në Britani të Madhe.
“Problemi më i madh me Mbretërinë e Bashkuar është fakti që shumë shqiptarë kanë marrë pasaportë britanike si shtetas kosovarë duke shfrytëzuar luftën e Kosovës. Ata kanë përdorur emra falsë për të marrë nënshtetësinë britanike. Zyrtarët nuk mund ta bëjnë dallimin mes shqiptarëve dhe kosovarëve”, tha zyrtari i Interpol Tiranës.
Ai shton gjithashtu se procesi për të ekstraduar një person nga Britania e Madhe është shumë e gjatë dhe kjo i jep kohë të dyshuarit që të largohet.
Saliman Barçi shkoi në Britani të Madhe në vitin 2002 dhe përfitoi azil duke përdorur identitet fals si shtetas nga Kosova.
“Daily Mail” ka marrë informacione zyrtare nga Tirana për të tjerë shqiptarë të kërkuar në shtetin ishullor, që janë Kadri Hoxha 56 vjeç dhe Avni Metra 53 vjeç, të dy nga Burreli dhe për të cilët Shqipëria ka kërkuar nga Anglia ekstradimin e tyre, por që ende nuk janë gjetur.