Këngëtarja e njohur Rovena Dilo ka bërë një letër të hapur për dy politikanë të cilët sipas saj po i vjedhin pronën.
Dilo është e përfshirë në një konflikt pronësie prej kohësh ndërkohë që duket se cështja gjyqësore ka përfunduar në disfavor të saj. Bëhet fjalë për një konflikt em deputetin Tom Doshi dhe ish deputetin Ndricim Babasi.
Por më në detaje mund të mësoni përgjatë letrës së saj:
“Dy fjalë juve, dy zotërinjve të “politikës” shqiptare dhe të gjithë atyre që ju mbështesin fort në rrugëtimin tuaj drejt zhvatjes.
Unë kam një pyetje të thjeshtë dhe jua bëj atë, në emrin tim dhe në emrin e të gjithë shqiptarëve që persekutohen çdo ditë nga plotfuqia juaj pothuajse magjike.
Kush jeni ju?!
Që doni të rrëmbeni pronën e familjes time?!
Kush jeni ju që doni të shkatërroni trashëgiminë tonë, gjakun, nderin dhe jetën tonë. Kush jeni ju që nuk pyesni për bizneset tona, që janë ngritur me djersë dhe me mundimin tonë të çdo dite.
Pse keni ju pothuajse fuqinë e Zotit?!
Pse keni ju akses që për 24 orë të hipotekoni dhe ç’hipotekoni çfarë të doni dhe kur të doni?! Mos jeni gjë pronarët e këtij vendi, ju që arrini të caktoni cilindo gjykatës që doni, në të gjitha shkallët e gjyqësorit?
Unë po e them publikisht se ju keni bërë ç’keni dashur!
Ju që zgjidhni gjykatësit tuaj, pra maliqët tuaj, të cilët e shkelin ligjin, e keqinterpretojnë dhe bëjnë me ligjin çfarë të duan. Vetëm ju arrini të manipuloni gjykatën e Apelit në kohë rekord. Të nxirrni çështjen, gjykatësin që doni, të mos lajmëroni të paditurin dhe të merrni vendimin duke e ditur vetëm ju. Tamam si në kohërat e errëta të diktaturës kur njerëzit i merrnin në fshehtësi, i pushkatonin, i groposnin, u merrnin dhe pronën dhe përgjegjës nuk ishte askush.
Si ka mundësi që ju arrini të nxirrni në 24 orë vendimet edhe në gjykatën e Lartë duke habitur çdo shqiptar të ndershëm, çdo jurist të ndershëm, çdo gjykatës të ndershëm.
Ju them të gjithë juve zotërinjve që doni të rrëmbeni pronën e familjes time dhe pronat e çdo shqiptari të ndershëm që nuk mbrohet dot nga ju – e keni kot!
Koha juaj po perëndon.
I bej thirrje Presidentit të Republikës, Kryetarit të Parlamentit, Kryeministrit, që të mos fshihen por të shprehen qartë për këtë rast!
Ata do të vijnë të hënën, më 9 maj, në orën 10 të më nxjerrin me polici nga prona ime! Le të vijnë! Unë nuk trembem! Turpi do të jetë për ta, por edhe për shtetin dhe shtetarët tanë! Të hënën është radha ime, por më pas është radha e secilit!”
Pjesë nga vendimi i Gjykatës së Shkallës së Parë:
“Gjykata, në vendimin e zbardhur, thotë se nga hetimi gjyqësor rezultoi se Ndriçim Babasi dhe Tom Doshi janë pronarë mbi një pasuri të paluajtshme me sipërfaqe 887 m² me adresë në rrugën “Vaso Pasha”. Ky fakt u vërtetua nga certifikata për vërtetim pronësie lëshuar më datë 11 qershor 2014, bashkëngjitur kartela e pasurisë së paluajtshme dhe harta treguese e regjistrimit. Origjina e pronësisë mbi këtë pronë rezultoi të jetë kontrata e shitblerjes e datës 10 qershor 2014 e regjistruar në zyrën ZRPP. Sipas kësaj kontrate, ata janë në rolin e blerësit, ndërsa si shitës i pronës rezulton të jetë shtetasi Agron Vreto. Pala e paditur (Rovena Dilo) prapësoi duke kërkuar rrëzimin e padisë me argumentin kryesor se paditësit nuk janë pronarë të ligjshëm, pasi e paditura kundërshton aktin nga i cili u buron pronësia paditësve. Ndërkohë, Doshi e Babasi pretendojnë se shitësi i pronës, Agron Vreto, i cili është daja (vëllai i të ëmës) i të paditurës e kishte regjistruar pronën në bazë të një kontrate dhurimi. Më konkretisht, origjina e pronës së shitësit është kontrata e dhurimit e datës 2 dhjetor 1995, lidhur ndërmjet dhuruesit Naim Vreto dhe pranuesit të dhurimit, Agron Vreto. Sipas Dilos, “në vlerësimin tonë, titulli i paditësit, i fituar në mënyrë të prejardhur, është i pavlefshëm, pasi rrjedh nga një kontratë dhurimi absolutisht e pavlefshme”. Gjithashtu u administrua në gjykim dhe certifikata për vërtetimin e pronësisë, pra para se të kryhej shitja e pronës objekt gjykimi, ku kjo pasuri figuronte në emër të shitësit Agron Vreto. Ndodhur në këto kushte, gjykata krijon bindjen se paditësit provojnë plotësisht faktin se janë pronarë mbi pasurinë me sipërfaqe 887 m² me adresë të pasurisë rruga “Vaso Pasha”.
