Eksplozivi në makinë, zbardhet pista e mundshme e hetimit

Pista e parë mbi të cilën po heton policia e Tiranës mbi sasinë e eksplozivit që u gjet sot në mjetin tip “Benz” të parkuar pranë shkollës 9-vjeçare “Niket Dardani”, ka të bëjë me konfliktet e mundshme të pronarit të makinës.
Burime të policisë bëjnë të ditur se dyshohet që Shefqet Rapi ka konflikte të mëparshme pronësie. Ndaj edhe hetuesit janë përqendruar në emrat që vetë pronari i mjetit ka dhënë për policinë, të personave që ka pasur çështje pronësie të cilat i kanë futur në konflikt.
Policia e Tiranës ka konfirmuar se në mjetin tip “Benz” të parkuar pranë shkollës 9-vjeçare “Niket Dardani” ishte vendosur një sasi prej 400 gr eksploziv të dyshuar si C4.
Pakoja ishte mbështjellë me natriban dhe ishte vendosur poshtë sediljes së pasme të pasagjerit.
Dyshimet e para erdhën nga pronari i mjetit, Shefqet Rapi, i cili pa xhamin e pasme të mjetit që ishte thyer. Ai njoftoi Policinë dhe ajo mbërriti në vendngjarje ku gjeti pakon e mbështjellë me natriban në të cilën kishte eksploziv dhe një qark elektronik që furnizohej me bateri.
Skuadra antieksploziv arriti ta çaktivizonte bombën. Ndërkohë, në pyetje janë marrë edhe pronari i mjetit, Shefqet Rapi, edhe personi që drejtonte automjetin me lejen e tij, Ariel Rapi.