32 dibranë që u zhdukën pa nam e nishan në vitin 1996 ndërsa kishin vendosur të shkonin në Greqi mund të jenë gjallë diku, sipas familjarëve të tyre. Ndoshta në një burg të sigurisë së lartë në Korfuz, shkruan sot Panorama.
Letrat, telegramet, telefonatat, kërkimet vijnë që nga 9 marsi i vitit 1996. Mediat e kohës dhanë lajmin tragjik se në Kanalin e Otrantos, teksa udhëtonin drejt Italisë, janë mbytur në det 32 djem e burra nga Dibra. Dibranët kërkonin të vërtetën e atij lajmi të keq, por as sot e kësaj dite ata nuk dinë rreth fatit të njerëzve të tyre të dashur. I vetmi lajm zyrtar i asaj kohe është njoftimi i Policisë së Dibrës se Sulejman Çoku ishte gjetur i pajetë në brigjet italiane. Për 9 vjet shteti, pra, strukturat e tij nuk u prononcuan rreth ngjarjes së rëndë. Ishministri i Rendit, Toska, në një takim që pati në Peshkopi me familjarët e këtyre viktimave u kundërshtua nga familjarët, me argumentin se djemtë e tyre ndodhen të burgosur në një burg të Greqisë dhe për këtë ata thanë se janë parë në ekranet e TV-ve të shtetit fqinj.Prindërit e Naim Çokut, babai, nëna dhe vëllezërit, i drejtohen qeverisë me apelin se duhet të interesohet maksimalisht për gjetjen e 32 dibranëve të zhdukur 20 vjet më parë. “Kemi bërë mjaft përpjekje për të mësuar rreth fatit të djemve tanë, por shteti është mjaftuar me shpalljen e tyre të mbytur në det. Por ne dyshojmë se ata janë gjallë të gjithë, pasi kufoma e Sulejman Çokut, që u gjet në brigjet e Italisë, ishte e lidhur pas mjetit të shpëtimit. Ne kemi informacione të shumta se ata janë gjallë dhe mbahen në burg. Ndaj i kërkojmë qeverisë të mundësojë gjetjen e tyre”, thotë babai i Naim Çokut. Të zhdukurit e atij viti, disa prej tyre kishin fëmijë që tashmë janë rritur pa kujdesin prindëror dhe nuk dinë rreth fatit të tyre.
Lista e emrave publikuar sot ne Panorama
Babai i Sigurim Keshit, një burrë rreth të 80ave i qëndron fort idesë se djemtë dibranë po vuajnë në burgjet greke, sepse kanë zëvendësuar të burgosurit e larguar nga ky burg. Rizvan Keshi thotë se dy nga të konsideruarit si të zhdukur i kanë telefonuar një radioje private në Maqedoni dhe janë shprehur se janë të izoluar në burgun e Korfuzit. Sipas tij, qeveria shqiptare nuk e ka të lehtë të gjejë të vërtetën, pasi autoritetet e vendit fqinj nuk do ta lejojnë një gjë të tillë. Në vitet e para të demokracisë mijëra banorë të Dibrës emigruan ilegalisht drejt Greqisë dhe Italisë. Sekserët që merreshin me këtë veprimtari i grumbullonin personat që dëshironin dhe i nisnin drejt zonave kufitare, tokësore dhe bregdetare. Ishin të shumtë dibranët që udhëtonin kryesisht drejt Vlorës, ku i prisnin skafistët për t’i dërguar në Itali. Të zhdukurit e Maqellarës mësohet të jenë nisur drejt Vlorës në ditët e para të muajit mars. Ata kanë udhëtuar grupe-grupe, kryesisht me furgonë.
Ashtu siç kishin rënë dakord para nisjes, janë ribashkuar në qytetin e Vlorës, ku i prisnin trafikantët për t’i dërguar matanë detit. Nisja është bërë natën e 8 marsit nga Vlora. Ndërkohë që një ditë më vonë autoritetet e Policisë Italiane kanë njoftuar Drejtorinë e Policisë Vlorë se një skaf me shqiptarë është mbytur në det. Zyrtarët e Policisë kanë lajmëruar pas katër ditësh drejtuesit e Komisariatit të Peshkopisë për mbytjen e Sulejman Çokut në brigjet e Italisë. Mësohet se çdo person ka paguar të paktën 1 mijë dollarë për të mbërritur në vendin fqinj, shkruan Panorama.
