25 vjet me parë ishte mes 700 studentëve që u futën në grevë urie, por Astrit Patozi nuk ka folur kurrë për këtë. Dhe tani në këtë intervistë nuk ndalet të rrëfejë përjetimet e atyre ditëve, por ndan shqetësimin se ka një lloj zbehje dhe keqpërdorimi të kësaj ngjarje historike. Nuk është çudi, thotë që një ditë Edi Rama të thotë që greva u organizua nga partia socialiste.
“Kur them keqpërdorim kam parasysh fetishizimin apo hiperbolizimin që sipas meje është i panevojshëm sepse ajo e ka vetë rëndësinë dhe vlerën e vet dhe nuk ka asnjë nevojë për ta bërë më të madhe seç ka qenë. Dhe keqpërdorimi apo abuzimi, manipulimi që bën pjesa tjetër dhe ne e kemi treguar në shumë raste, saqë unë nuk e teproj po të them që në rast se, larg qoftë Edi Rama do qëndronte për një kohë të gjatë në pushtet, nuk do ishte e largët dita që të thuhej se grevën e urisë së studentëve e organizoi partia socialiste. Sepse të tilla janë jashtë zhvillimit, theksoj se kishte një peshë të jashtëzakonshme”, deklaron ai.
Astrit Patozi figurë me rendësi e peshë në Partinë Demokratike, nuk mendon se vendi po rrëshqet në diktaturë, por sipas tij ashtu si 25 vjet më parë, Shqipëria është sërish në udhëkryq, por këtë herë jo për shkak të mungesës së lirisë, por të teprimit të saj.
“Pra ne atëherë kishim nevojë të domosdoshme, që të ndryshonim regjimin, sepse ishte një regjim që e kishte çuar vendin në zgrip. Kishim nevojë të shpëtonim nga diktatura dhe e bëmë. Dhe sot ne kemi po kaq nevojë si shoqëri për të shpëtuar nga një lloj regjimi tjetër, i cili nuk është diktaturë, po që në një farë mënyrë jem duke shkuar në drejtimin e kundërt të asaj që jemi nisur. Ne jemi në drejtim të kundërt. Unë mendoj se, po aq nevojë sa ç’kishte atëherë të rrëzohej diktatura, po aq nevojë kemi sot të shpëtojmë nga ky lloj regjimi, kleptokratik, i korruptuar dhe ku gjërat shkojnë keq e më keq”, thekson Patozi.
Ai e ka të qartë që shpëtimi nga ky sistem i kalbëzuar për arsye politike vjen përmes një shkundje, një rithemelimi të republikës, një lëvizje si e çerek shekulli më parë e cila duhet udhëhequr nga forca me e madhe opozitare ne vend.
“Dhe unë që jam legjitimist këtë lëvizje nuk e pres nga jashtë sistemit, e pres nga brenda sistemit dhe PD ka detyrimin dhe detyrën që ta udhëheqë këtë lëvizje. Fati dhe jo nostalgjia, jo vetëm thjesht lidhja me grevën e urisë, para 25 viteve e çon PD drejt destinacionit të vetëm të saj, që të jetë shpresa e vetme, për të udhëhequr këtë nevoje popullore, nevojë shoqërore, për të ndryshuar gjerat në Shqipëri”, shprehet deputeti demokrat.
Por, zoti Patozi mendon se për të bërë të mundur këtë shkundje që i nevojitet vendit, ka nevoje edhe për një frymë proteste në shoqëri që për fat të keq thotë ai, mungon.
“25 vite më parë në grevën e urisë njerëzit mbanin radhë për të hyrë brenda sepse 700 e ca ishim në që u futëm brenda, por ishim më tepër ato që donin të hynin por nuk kishin më vend. Pra të rinjtë e saj kohe mbanin radhë për një mision, apo për një ideal apo qoftë dhe sakrificë. Sot kjo nuk ndodh për fat të keq. Sot për arsye tona, për arsye politike, për deformimin e sistemit, të rinjtë mbajnë radhë për konformizëm, për t’u servilosur por jo për të sakrifikuar dhe për të pasur një mision dhe kjo është një gjë që duhet të ndryshojë. E ritheksoj i takon opozitës dhe PD si lokomotiva e opozitës që ta udhëheqë vendin duke i nxitur shpirtin e protestës dhe reagimit”, nënvizon ai.
Që Partia Demokratike të ketë sukses në këtë lëvizje, Astrit Patozi kërkon që ajo të jetë më gjithëpërfshirëse dhe që të frymëzojë.
“PD ka bërë sa ka mundur gjatë kësaj kohe, nuk ka ndenjur duarkryq për hir të vërtetës. Ajo që mendoj se duhet bërë më mirë është përfaqësimi i sa më shumë shtresave që sot për shkak të keqqeverisjes gjendjen ne vështirësi. Ne kemi qenë të lavdërueshëm do thosha në denoncimin e korrupsionit dhe shfaqjeve te tjera të keqqeverisjes, mund te kemi pasur dhe inflacion në këtë pikë, por nuk kemi qenë aq sa duhet frymëzues për të ngjallur besim dhe për të ngjallur shpresën që tek ne është e vetmja zgjidhje”, thotë ai.
Astrit Patozi, ka treguar se thotë ato që mendon pavarësisht se kjo mund të ketë kosto. Hera-herës ka qenë kritik ndaj Lulzim Bashës. Por, sipas tij edhe pse me një filozofi drejtimi të ndryshme nga ajo e Sali Berishës kjo nuk përjashton mundësinë që ai të jetë i suksesshëm.
“Zoti Basha dhe Zoti Berisha ndryshojnë shumë dhe këtë nuk kam nevojë ta them unë, janë koshientë dhe ata vetë, e kanë thënë vetë në një farë mënyrë. E dinë të gjithë, është një gjë e njohur botërisht por kjo nuk është pengese që PD të drejtohet me sukses. Për shkak se nuk e përcakton as stili dhe as temperamentin lidershipin, pra aftësinë për të drejtuar. Absolutisht. Unë njoh plot udhëheqës që janë flegmatik në botë dhe rajon që, kanë arritur suksese shumë të mëdha, udhëheqës patetik apo dhe karizmatik që kanë pasur po kaq sukses”, deklaron Patozi.
25-vjetori i rrëzimi të shtatores së diktatorit Hoxha e gjen Partinë Demokratike në opozitë. 2016 është shpallur stinë protestash nga lideri i saj, ndërsa sfida elektorale është vitin e ardhshëm.
“News 24”
