Deputetja e PS, Arta Dade doli sot hapur në krah të deputetit tjetër të kësaj partie që kërkon garë për kryetar në PS.
Dade i ka nisur një letër Gramoz Rucit nëpërmjet të cilës ajo i kërkon Sekretarit të përgjithshëm të PS të futë në rend të ditës se Kongresit përcaktimin e datës së votimit një anëtar, një votë për Kryetarin e PS dhe paraqitjen e platformave të kandidatëve në Kongres.
Dade i kujton Rucit vendimin e korrikut 2015 të Asamblesë Kombëtare të PS sipas të cilës është krijuar një grup pune për ndryshimet në statut dhe se këto ndryshime duhet të paraqiten përpara mbledhjes së Asamblesë e cila mblidhet para kongresit në mënyrë që të ketë mundësi për debate dhe diskutime.
Faksimile e letres se deputetes Arta Dade
Arta Dade është deputeti i katërt brenda PS që i përket grupit që mbështet garën brenda PS për kryetarin e saj.
Një natë më parë Ben Blushi tha se ka edhe deputetë të tjerë që mbështetin garën e tij për kryetar të PS-së, duke deklaruar se PS është kapur dhe se PS dhe Rilindja nuk janë e njëjta gjë.
Kur kanë mbetur edhe 5 javë nga zhvillimi i Kongresit të PS-së, priten zhvillime të reja. Grupi që kundërshton ratifikimin e kryetarit të PS duke shmangur votimin është mjaft i fortë brenda PS-së, por ndërkohë një pjesë e deputetëve që janë anashkaluar nga prurjet e reja të Rilindjes kanë nisur rezistencën.
Tek drejtues dhe forume të PS sundon bindja se qeveria nuk ka patur sukses dhe vazhdimi i saj pa u rifromatuar mund të sjellë tronditje në pushtetin e së majtës.
