Deputeti i PS-së, Ben Blushi nuk ka sulmuar sot Edi Ramën në parlament por ka replikuar me Berishën.
Berisha gjatë fjalës së tij në Parlament tha se Blushi nuk po bën një garë të mirë për kreun e PS-së duke nxitur deputetin socialist të përfshihej në replika të ashpra me të.
“Ke folur si komunist-otoman për politikën e jashtme. Ashtu je, komunist-otoman, se me Greqinë ishe në konflikt. Erdogani të tha frikacak në telefon se nuk i dhe votën, edhe pse ia premtove. Partinë e shqiptarëve në Maqedoni e përçave. Edhe Kosovën e përçave”, tha Blushi.
Ndërkaq duke folur për garën brenda PS Blushi tha se Berisha nuk mund të jetë model demokracie.
“Ne jemi në një garë në parti për arsyet tonë. Ti ç’punë ke?! Tesërën e Partisë së Punës e ke lënë para shumë vjetësh.Unë të njoh se çfarë ke bërë ti në këto 20 vjet. E mban mend Eduart Selamin? E çove në Amerikë për 10 vjet”, tha Blushi duke përsëitur edhe pak më vonë të njëjtat deklarata. “Nëse çohesh dhe tregon se si i trajtove kundërshtarët e tu brenda PD është lajm. Se si e çove Eduard Selamuin në Amerikë, si e nxore Pollon jashtë partie. Gjithmonë do jem kundër teje, se ti nuk ndryshon. Se ti Sali je një otoman-komunist dhe në Ballkan je i fundit”, tha Blushi.
“Sot unë dua të bëj një garë që modeli yt të mos vijë në PS. S’mund të dalësh ti pas 20 vjetësh dhe të na tregosh demokracinë brenda partisë”, tha Blushi.
