“Fondi i detyrueshëm shëndetësor, mbikëqyret drejtpërdrejt nga Ilir Beqa, i cili është kryetar i bordit. Ky institucion me në krye Ilir Beqën, është zhytur në një abuzim të paimagjinueshëm dhe miliona janë vjedhur në çdo drejtim; në kancelari, bileta, udhëtime jashtë, riparime makinash, blerje karburanti, organizime aktivitetesh, madje edhe për aheng”.
Ky është denoncimi i radhës i deputetes së PD-së, Albana Vokshi, i bërë publik sot para medieve.
Duke u ndalur në raste konkrete, me shifra ajo ka demonstruar dëmet në arkën e shtetit nga këto abuzime.
“Inspektorët e KLSH kanë kapur një dëm ekonomik në vlerën 5 milionë lekë në zërin rregullim makinash. Dëmi ekonomik me karburantin është 10 milionë lekë. 51 milionë lekë është dëmi nga dietat për udhëtime jashtë vendit, me fatura të parregullta dhe fotokopje. 25 milionë lekë është dëmi i konstatuar në blerje kancelarie. 5 milionë lekë janë shpenzuar për kokteje dhe darka me muzikë live, dhe lloj lloj ahengjesh”, vijoi Vokshi.
Për deputeten e PD-së, Ilir Beqaj nuk është i vetmi, ndërsa qindra milionë lekë përfundojnë në xhepat e qeveritarëve, në garën midis tyre, kush të vjedhë më shumë.
“Ja pra si qeveriset ky institucion i kësaj qeverie, që mbikqyret drejtpërdrejt nga Ilir Beqa. Qindra milionë lekë të abuzuara që përfundojnë në xhepat e qeveritarëve me një babëzi skandaloze, me një hyxhym se kush të gllabërojë më shumë”, vazhdoi denoncimin në emër të PD-së, deputetja e kësaj partie.
Në mënyrë të përsëritur Albana Voksi ju drejtua organit të akuzës, për hetimn e këtyre shkeljeve dhe abuzimeve.
“Këto akte ku përgjegjës është kampioni i korrupsionit Ilir Beqa, janë tashmë në Prokurori. Partia Demokratike i bën thirrje të përsëritur Prokurorisë të veprojë. Të veprojë me shpejtësi, profesionalizëm dhe vendosmëri e të dërgojë para drejtësisë pa zvarritje të mëtejshme kampionin e korrupsionit Ilir Beqa”, përfudoi deputetja Albana Vokshi.
