Nga Lindita Cela
Prokuroria e Fierit i tha BIRN se hetimet kundër Drejtorit të Përgjithshëm të kompanisë shtetërore të hidrokarbureve
Endri Puka dhe disa zyrtarëve të tjerë të saj nuk kanë zbardhur elementë të veprave penale për të cilët ato akuzoheshin nga Kontrolli i Lartë i Shtetit.
“Vendimi për dosjen nuk është marrë ende, por që deri më tani në asnjë prej akuzave të ngritura nga raporti i
Kontrollit të Lartë të Shtetit nuk janë gjetur elementë të veprës penale, dhe me shumë gjasa vendimi do të jetë ai i pushimit të hetimeve për këtë dosje,” tha Prokurori i Rrethit Fier Ardian Ylli.
Më 24 shator 2014, KLSH depozitoi në organin e akuzës një kallëzim penal, në të cilin pretendonte se shtetit i është shaktuar një dëm prej më shumë se 10 milionë eurosh nga veprimtaria e kundraligjshme e kreut të Albpetrol Sha dhe e disa zyrtarëve të tjerë të kompanisë.
Sipas KLSH-së kreu i Albpetrol Endri Puka akuzohet se kishte nënshkruar dy marrëvshje hidrokarbure me një kompani koncensionare, duke anashkaluar procedurat standarde dhe duke tejkaluar kompetencat e tij administrative, në shkelje flagrante të kontratës koncensionare bazë me kompaninë.
“Këto dy akt-marrëveshje, Administratori i shoqërisë jo vetëm nuk ia paraqiti për miratim Këshillit të Ministrave, por as dhe Këshillit Mbikëqyrës të shoqërisë
Albpetrol, madje siç rezultoi nga auditimi në lidhje me to nuk kishin dijeni edhe një pjesë e strukturave dhe drejtuesve të kësaj shoqërie,” shkruan
KLSH në një njoftim për shtyp.
“Në to favorizohet haptazi kompania koncensionare së cilës Albpetrol i jep mundësinë që detyrimet e saj për dorëzimin e naftës bruto (të akumuluara ndër vite) t’i shlyente duke paguar një vlerë të caktuar monetare,” KLSH shtoi.
Sipas KLSH-së përcaktimi në mënyrë arbitrare nga drejtori i Albpetrol i çmimit të shitjes dhe kostove të zbritshme të kësaj sasie nafte te koncensionari ka sjellë një dëm për Albpetrol që llogaritet në disa miliona dollarë.
“Si rrjedhojë, vetëm si pasojë e kësaj rritje artificiale dhe të paargumentuar të kostove të transportit, kompania koncensionare ka përfituar 1,416,443 USD në dëm të interesave financiare të Albpetrol,” shkruan KLSH.
“Hetimi i thellë nga një grup ekspertësh të fushës, që do ti bëhet mënyrës së përcaktimit të çmimit të konvertimit nga Albpetrol (data e shitjeve dhe e blerjeve, kuotimi në bursë, konvertimi nga ton në barel, etj) do të vërtetojë edhe vlera të tjera të dëmit real në miliona Euro, të shkaktuar në Buxhetin e Shtetit,” shton ajo.
Në një kontratë tjetër koncensionare Albpetrol akuzohet se i ka zbritur një kompanie hidrokarburesh nga sasia e naftës së prodhuar sasinë e holluesit të përdorur, duke sjellë një dëm prej 9.5 milionë euro.
“Si pasojë e këtij veprimi kompania nuk i kishte dorëzuar shoqërisë Albpetrol për vitin 2013 sasinë prej 23,004.35 ton naftë me vlerë 7.2 milionë euro, ndërsa deri më 30.06.2014 sasinë prej 7,188.70 ton naftë bruto me vlerë 2.3 milione euro,” shkruan KLSH.
“Kjo zbritje e holluesit nga Albpetrol është bërë në kundërshtim me pikën 3.5.1,3 të marrëveshjes së datës 19.06.2004 me kompaninë koncesionare, dhe është kryer duke ndikuar në faktorin R, ecuria e të cilit ka lidhje direkt me përfitimet e Shtetit shqiptar,” shtoi ajo.
KLSH gjithashtu pretendon që përveç dëmit financiar, për të cilin kërkon një hetim të thelluar nga ana e Prokurorisë, Endri Puka ka ngritur në Albpetrol një strukturë paralele me adminsitratën e kompanisë nëpërmjet Drejtorisë së Marrëveshjeve dhe Hidrokarbureve.
“Nga 150 punonjës që është personeli i administratës së Albpetrol, 63 prej tyre i përkasin Drejtorisë së Marrëveshjeve dhe Hidrokarbureve; madje, disa punonjës të kësaj drejtorie, në veçanti ata të Sektorit të supervizimit, janë pa profesionet përkatëse (inxhinier ndërtimi, inxhinier tekstili, inxhiniermekanik) ose janë të padiplomuar,” shkruan KLSH.
Kallëzimi i KLSH-së në fillimi iu përcoll Prokurorisë së Krimeve të Rënda, për shkak se dyshohej se abuzimi në Albpetrol ishte bërë nga një grup i strukturuar kriminal, vepër penale nën juridiksionin e kësaj prokurorie.
Por sipas zëdhënësit të Prokurorisë së Përgjitshme Albi Serani, pas tre muajsh
Prokuroria e Krimeve të Rënda ka vlerësuar se “kallzimi i bërë nuk është para kushteve të grupit të strukturuar kriminal, dhe për këtë arsye ka vendosur që dosjen ta kalojë për kompetencë të Prokurorisë së Fierit”,
Me 12 Janar, 2015 në Prokurorinë e
Fierit është regjistruar procedimi penal me akuzën e shpërdorimit të detyrës për drejtuesit e kompanisë shtetërore të hidrokarbureve.
Gjashtë punonjës të Albpetrol përfshirë Drejtori i Përgjithshëm Endri Puka u morën nën hetim, të dyshuar se patën konsumuar elementë për veprën penale të “Shpërdorimit të detyrës”, “Shkeljes së barazisë së pjesëmarrësve në tenderë apo ankande publike”, si dhe “Korrupsionit aktiv/pasiv të personave që ushtrojnë funksione publike”
Pas një viti hetimesh
Prokuroria e Fierit nuk ka gjetur elementë të veprës penale në aktivitetin e ketyrë zyrtarëve, dhe tashmë po bëhet gati ta arkivojë çështjen.
