Moratoriumi për ndalimin e prerjes së pyjeve për 10 vite rresht do të ketë edhe përjashtime.
“Sot jemi në kushtet kur të shkojmë një hap më tutje dhe për ndalimin absolut të shfrytëzimi të pyjeve për qëllime fitimi, të shkojnë përtej nevojës jetike për banorët për t’u ngrohur. Kjo e fundit është e vetmja pjesë e pranueshme në këtë proces”.
Kryeministri Rama tha se nëse shfrytëzimit nuk do t’i vihej fre, pas 15 vitesh në Shqipëri, situata do të ishte dramatike. Rama theksoi se vetëm në qeverisjen e shkuar të së djathtës janë djegur e prerë rreth 260 mijë hektarë pyje dhe dhënë qindra liçenca pa asnjë lloj kriteri.
“Prerja e pyjeve ka qenë 2 deri në 3 herë më e madhe se rritja e tyre.. vetëm në periudhën e qeverisjes së mëparshme, janë prerë dhe janë djegur 260 mijë hektarë pyje.
Duhet një kurajo vetëm që e kanë ata, për të hapur gojë dhe për të kërkuar sot hesap për pasojat që janë kaq të lexueshme dhe që ishin plotësisht të pritshme, duke patur parasysh se cfarë ka ndodhur… për shkak të licensave të dhëna pa kriter e karar, për shkak të 400 e kusur licencave për hidrocentrale pa kriter e karar që kanë sjellë rrafshime mijëra hektarëshe, në mënyrë që sot të mos kemi më asnjë lloj hezimi për të vënë moratoriumin 10 vjeçar”, theksoi Rama.
Moratoriumi, tha shefi i ekzekutivit ka pasur oponencë. Pa përmendur emra, ai tha se edhe deputetë e kanë kundërshtuar atë.
“Moratoriumi është një kërkesë që nuk mund të refuzohet më nga ligjvënësit e Shqipërisë, është në Parlament dhe ne presim me padurim hapjen e sesionit të ri për të miratuar moratoriumin, për të cilin është dashur të diskutojmë pafundësisht me grupe interesi që preken nga kjo masë drastike, por dhe me deputetë që për një arsye apo një tjetër, pa i paragjykuar, por pa mundur t’i mirëkuptoj më asnjë ditë më shumë, i janë kundërvënë”
Ministri i Mjedisit Lefter Koka, dikasteri i të cilit ka hartuar draftin, tha se zbatimi i monitorimit kundër prerjeve të pyjeve do të vëzhgohet me kamera termike. Ministri Koka bëri me dije se përgjegjësi për zbatimin e ligjit për pyjet, do të kalojë në administrim të qeverisjes vendore, që do të mbahen nën mbikëqyrje nga Inspektorati i Mjedisit.
