Greqi, asgjësohet banda e grabitësve shqiptarë, 7 të arrestuar, 16 të tjerë në kërkim

Policia greke ka asgjësuar një organizatë kriminale që kishte kryer një numër grabitjesh në zona të ndryshme të Greqisë.
Janë arrestuar 7 shtetas shqiptarë, mes të cilëve edhe dy krerët e organizatës, ndërsa janë shpallur në kërkim 16 të tjerë, kombësia e të cilëve nuk bëhet e ditur dhe që shumica e tyre tashmë janë identifikuar. Dy prej të akuzuarve faktikisht ndodhen në burgjet greke, ku vuajnë dënime për vepra të ndryshme.
Sipas komunikatës së policisë, organizata vepronte e ndarë në dy banda. Njëra prej tyre sulmonte banesa në qytete, që u përkisnin njerëzve me gjendje të mirë ekonomike, ndërsa tjetra i bënte grabitjet në zonat më të largëta, ku ishte i vështirë lokalizimi i autorëve nga policia.
Organizata vepronte në Atikë, në Peloponez, në Eube dhe në Korinth. E veçanta e saj, sipas policisë, ishte se grabitësit në shumë raste i torturonin viktimat me qëllim që t’u tregonin se ku i kishin paratë dhe bizhuteritë.
Në komunikatë bëhet e ditur se komisariati i policisë i Patras ka zbardhur 13 grabitje, dhe ka sekuestruar 35.000 euro, ndërsa përfitimi i përgjithshëm i organizatës kriminale nga e gjithë veprimtaria, përllogaritet në 250.000 euro.
Në operacionet e arrestimit, të kryera në disa zona, policia ka sekuestruar përveç parave, dy automjete, shumë bizhuteri, pajisje elektronike dhe elektro-shtëpiake, si dhe telefona celularë.
Gjithë të arrestuarit do të paraqiten të mërkurën në prokurorinë e Patras, ndërsa policia po vazhdon punën për gjetjen dhe kapjen e personave në kërkim.