Në seancën e sotme gjyqësore, ku po gjykohen për nxitje të urrejtjes fetare dhe rekrutim të personave për qëllime terroriste, imamët e akuzuar, sërish kanë lëshuar kërcënime në formë “paralajmërimi”, këtë herë ndaj drejtuesve të lartë të qeverisë.
Në seancën e sotme ndaj 9 imamëve të vetëshpallur, që akuzohen për rekrutimin e xhihadistëve për të luftuar në Siri, i pandehuri Fadil Myslimani është shprehur i irrituar, për atë që sipas tij, vrasja e francezëve konsiderohet tragjedi, ndërsa vrasja e myslimaneve nuk i bën përshtypje askujt.
Ai tha se, “ministri i Punëve të Brendshme Saimir Tahiri nuk ka arsye pse të frikësohet, por nëse ka bërë gjë kundër myslimanëve atëherë po që duhet të ketë frikë”.
I pandehuri Fadil Muslimani ka folur edhe për kryeministrin, duke iu referuar me termin Piktori.
“Rroftë Franca e piktorit Mason. Në Francë kanë kryer studimet dy diktatore shqiptare”.
I pandehuri tjetër Edmond Balla është shprehur në sallën e gjyqit se amerikanet, francezët, rusët dhe iranianët duan të pushtojnë Lindjen e Mesme po myslimanët duhet të dalin në mbrojtje.
Balla ka shprehur gëzim për shqiptarët e vrarë në Siri, të cilet sipas tij kanë rënë Sheit për Allahun.
Mediat janë mbajtur në sallën e gjyqit vetëm për pak caste dhe me pas seance ka vijuar pa praninë e kamerave.
Në gjykatën Krimeve të Rënda, seanca e radhës ndaj 9 imamëve të vetëshpallur të cilët akuzohen për rekrutimin e xhihadistëve për të luftuar në Siri, është zhvilluar nën masa të shtuara e të forta sigurie. Agjentë antiterror dhe efektivë të policisë ishin të pranishëm në sallë për të shmangur çdo incident të mundshëm.
Kjo është seanca e parë që mbahet që pas sulmeve terroriste të 13 nëntorit në Paris dhe pas kërcënimeve që ju kanosën disa vendeve të Evropës për sulme të tjera nga ISIS. Edhe Shqipëria ka shtuar masat në institucionet e rëndësisë së veçantë dhe hapësira publike ku ka më shumë lëvizje, për të garantuar sigurinë.
