Vendi ku u gjet trupi i pa jetë i 82-vjeçarit
Novruz Likometaj
, si edhe fotoja e tij
Policia e Fierit arrestoi mbrëmë autorin e dyshuar për vrasjen e 82-vjeçarit, Novruz Likometaj. Burime nga grupi hetimor bënë të ditur mbrëmë se krimi u zbulua pas një hetimi intensiv dhe të dhënave të mbledhura nga të njohurit e banorët e lagjes ku banonte viktima.
Skënder Krasniqi, 37 vjeç, u arrestua pasi masakroi të moshuarin, për shkak se ky i fundit i ngacmonte në mënyrë të vazhdueshme nënën.
“Krimi ka ndodhur për shkak se viktima ngacmonte nënën e autorit. Nuk mund të japin të dhëna të tjera, për shkak se mund të prishim hetimin. Dyshojmë se në krim kanë marrë pjesë më shumë se dy persona”, bënë të ditur burime nga grupi i hetimit në Polici.
Ndonëse kemi të bëjmë me një 82-vjeçar, që në fillim është dyshuar për një krim hakmarrje, nisur edhe për nga mënyra e masakrimit të të moshuarit. Trupi ishte masakruar disa herë me thikë, ishte prerë në fyt dhe kishte marrë goditje në kohë.
Paraprakisht, dyshohet se autorët që kanë qenë të paktën dy persona, të cilët e kanë goditur e masakruar atë në një ambient të brendshëm afër vendit ku u zbulua trupi. Madje, ka dyshime se krimi është kryer në blloqet e pallateve, në lagjen ku u zbulua krimi i rëndë (lagje ku banonte edhe vetë viktima).
Autorët kanë pritur derisa ka rënë errësira dhe, duke shfrytëzuar edhe mungesën e lëvizjeve për shkak të motit të keq, e kanë hedhur trupin në kazanin e plehrave. Dyshohet se ata kanë shpresuar se të nesërmen makina e mbledhjes së mbeturinave do ta hidhte në pikën e grumbullimit dhe i moshuari me shumë gjasa do të “zhdukej” pa asnjë provë.
Ndërkohë, mësohet se pritet të kryhen të tjera arrestime.
Trupi i pa jetë i 82-vjeçarit u gjet dje në një kosh mbeturinash në rrugën “Mal Nito”, në lagjen “8 Shkurti”, hedhur në një kosh mbeturinash, i mbështjellë me një çarçaf.
