“Shumica e babëzitur” nuk ia heq mandatin Vlentina Leskajt

Ka përfunduar mbledhja e Këshillit të Imuniteteve dhe Mandateve të Deputetëve. Në përfundim të saj, mazhoranca ka vendosur të mos i hiqet mandati deputetes Valentina Leskaj.
Në përfundim të mbledhjes, deputeti Arben Ristani u shpreh se, “Shumica e babëzitur nuk ia hoqi mandatin Valentina Leskajt. Në fakt ne nuk prisnim ndonjë gjë ndryshe, ashtu sikurse nga kjo shumicë e babëzitur. Nuk presim gjë as në diskutimin publik në seancë plenare. Në përfundim të këtij diskutimi dhe në varësi të vendimit, do të vendosim për t’ju drejtuar Gjykatës Kushtetuese”, u shpreh Ristani.
Kërkesa për heqjen e mandatit deputetes Valentina Leskaj, ishte depozituar nga PD.
Për PD ekzistojnë plotësisht kushtet për mbarimin e mandatit të deputetes socialiste, Valentina Leskaj, e cila sipas opozitës, ka shkelur Kushtetutën dhe ligjin për konfliktin e interesit të zyrtarëve të lartë.
Arben Ristani argumentoi pretendimin e opozitës në mbledhjen e Këshillit të Mandateve në Kuvend. Ai përmendi dy raste që lidhen me dy djemtë e deputetes Leskaj, që sipas opozitës, kanë përfituar para nga fondet publike.
“Njëri nga djemtë e deputetes Leskaj ka marrë nga pasuria publike me koncesion një segment të hekurudhës shqiptare. Fenomeni është bërë publik, ndërsa djali tjetër ka dy kontrata, një më 24 nëntor 2014 me Ministrinë e Bujqësisë, ku ka marrë 45 milionë lekë tenderim përmes firmës ‘Abcons’, ndërsa në rastin e dytë përmes firmës ‘Matrix Contructions’ ka marrë 1 milion Euro kontrata të lidhura me institucione shtetërore dhe para publike”, tha Ristani.
Deputeti demokrat iu referua nenit 70 të Kushtetutës dhe ligjit për konfliktin e interesit dhe rasti në fjalë, sipas tij, plotëson të gjitha kushtet e papajtueshmërisë, ndaj mandati i Valentina Leskajt duhet të përfundojë menjëherë.
Ristani shtoi se kërkesa e PD-së vërtetohet edhe më shumë nga fakti që menjëherë pas denoncimit të opozitës, djemtë e deputetes Leskaj, sipas tij, kanë shitur pjesët e aksioneve në shoqëritë ku kanë qenë ortakë.
Ndërkohë, avokati i deputetes Leskaj deklaroi se kërkesa e opozitës nuk qëndron dhe se nuk bëhet fjalë për një shkelje të ligjit të parandalimit të konfliktit të interesit të zyrtarëve të lartë.