Si edhe pritej është publikuar sot progres-raporti i komisionit europian për Shqipërinë. Në progres-raport thuhet se zgjedhjet vendore të vitit 2015 u kaluan përgjithësisht pa incidente, por pati politizim të procesit elektoral. Progres-raporti rekomandon një dialog më konstruktiv ndërpartiak, si edhe të bëhet më shumë në kulturën politike ne vend. Në progres raport është përfshirë gjithashtu edhe çështja e reformës në administratë.
Raporti vlerëson së administrata në Shqipëri është e përgatitur në mënyrë të moderuar por thuhet se duhen ende përpjekje për të arritur objektivin për një administratë publike profesionale, e të depolitizuar. Lidhur me çështjen e vendorit, raporti vëren se duhet rritur kapaciteti për njësitë vendore si ai financiar e administrativ. Progres-raporti kërkon në vijim që të zbatohet ligji për shërbim civil në nivel lokal. Sa i takon sistemit gjyqësor në Shqipëri, raporti vëren se sistemi gjyqësor është në fazat e para të përgatitjes, ndërsa vëren probleme substanciale në të, si pavarësinë dhe përgjegjshmërinë e gjyqtarëve, pavarësinë e prokurorëve.
Gjithashtu raporti vëren se ka probleme me vendimet e gjyqësorit edhe pse ka një komision ad hoc për reformën gjyqësore. Sa i përket korrupsionit në vend, raporti vëren se ka një nivel përgatitjeje në këtë luftë, ka strategji anti-korrupsionit dhe një plan veprimi, por fenomeni është i shpërndarë gjerësisht, ndaj edhe kërkohen më shumë përpjekje për progres në luftën anti-korrupsion si edhe më shume punë për hetime në të gjitha nivelet.
Johanes Hahn theksoi se pika të dobëta mbeten në shteti ligjor, reforma në drejtësi, çështja e pronës dhe e kompensimit të saj si dhe lufta ndaj krimit dhe korrupsionit.
“Në Shqipëri kam mirëpritur progresin për adresimin e 5 pyetjeve kryesore dhe disa reforma për të avancuar me procesin e integrimit. Më shumë duhet bërë në reformën në gjyqësor, kundër korrupsionit dhe krimit të organizuar, më shumë të drejta përsa i përket pronave dhe kompensimit të tyre”, tha Komisioneri Hahn.
