Kryetari i Parlamentit Ilir Meta është shprehur sot kundër reformës e cila mund të prekë kodin zgjedhor si dhe ka sulmuar një marrëveshje të hershme Berisha-Rama për ndryshimet në Kushtetutë. “ Nuk kam ndërmend të bëhem pjesë as unë dhe as partia e zotit Manjani e debatit falls që kërkon të shmangë vëmëndjen nga problemet e vërteta që ka vendi. Nuk është problemi i Kushtetutës që ka krijuar probleme edhe në sistemin e drejtësisë. Problemet janë krijuar ndryshimet natën e 28 prillit të vitit 2008 që dëmtuan raportet e kontrollit dhe balancës në një shtet të së drejtës:, tha Ilir Meta.
Me tej Ilir Meta tha se parlamenti duhet të punojë shumë shpejt për të përmbushur marrëveshjen për dekriminalizimin pasi ajo implikon edhe imazhin e vendit.
“LSI ka një axhendë të qartë të saj dhe pika e parë është ti jepet fund procesit të dekriminalizimit se po implikohet imazhi i vendit, i deputetëve që nuk emertojnë të karakterizohen me këtë term. Ne do të mbyllim këtë proces që të kalojmë më pas në fushën e drejtësisë. Me qetësi dhe me shumë dashuri jemi për dekriminalizimin që e penalizon Shqipërinë ndërkombëtarisht. Jemi për realizimin reformës në fushën e drejtësisë, dhe jemi për të përmirësuar klimën e biznesit në vend. Edhe kur flasim për reformën në drejtësi ajo duhet të jetë në interes të qytetarëve shqiptarë”, tha Iir Meta.
Në vijim ai tha se ende nuk është njohur me shkresën e KLSH për hetimin e marrëveshjes së CEZ me qeverinë shqiptare nëpërmjet një komisioni parlamentar.
Ilir Meta në daljen e tij të parë pas vizitës në SHBA nuk tha asnjë fjalë për takimet e tij atje duke shmangur në të gjitha rastet pyetjet rreth saj. Vizita e Metës u errësua nga një intervistë në Zërin Amerikës, gjatë së cilës Meta humbi qetësinë ndërsa gazetarja Ardita Simicia e akuzoi atë për korrupsion.
