Nishani me ekspertët e “Venecias”: Reforma në drejtësi të jetë gjithëpërfshirëse, e efektshme dhe afatgjatë

Presidenti i Republikës, Bujar Nishani priti sot paradite një delegacion të përbërë nga ekspertë të Komisionit të Venecias, me të cilët zhvilloi një takim pune në kuadër të përgatitjes së opinionit të tyre mbi reformën në drejtësi.
Pasi u uroi mirëseardhjen Presidenti Nishani vlerësoi lart bashkëpunim e shkëlqyer mes Shqipërisë dhe Komisionit të Venecias në fushën e drejtësisë duke shprehur mirënjohjen për ndihmesën e vyer dhe ekspertizën e dhënë nga ky Komision në konsolidimin e demokracisë dhe të shtetit ligjor.
Kreu i Shtetit theksoi se reforma në sistemin e drejtësisë përbën një objektiv parësor dhe thelbësor në tërësinë e reformave të thella që ka ndërmarrë vendi ynë në përmbushje të aspiratës integruese si vend kandidat i Bashkimit Evropian.
Gjithashtu, Presidenti Nishani vuri në dukje se, “reforma në drejtësi duhet të jetë gjithëpërfshirëse, e efektshme dhe afatgjatë duke iu nënshtruar një diskutimi të gjerë e të detajuar publik me mendimet dhe sugjerimet e të gjithë aktorëve dhe grupeve të interesit, shoqërisë civile dhe ekspertëve të pavarur ligjorë”.
Presidenti Nishani dhe ekspertët e Komisionit të Venecias gjatë takimit të punës prekën edhe çështje që kanë të bëjnë me luftën kundër korrupsionit në drejtësi dhe reformimin thelbësor të sistemit gjyqësor, të parë edhe në kuadër të integrimit evropian të Shqipërisë dhe arritjes së standardeve më të përparuara demokratike evropiane.
Ekspertët e Komisionit të Venecias nënvizuan rëndësinë e jashtëzakonshme të realizimit të reformës në drejtësi dhe plotësimit të kritereve të nevojshme, duke shprehur dhe garantuar edhe njëherë për mbështetjen e pakursyer të tyre dhe ofrimit të ekspertizës së tyre ligjore sipas standardeve më të mira të Bashkimit Evropian.