OSHEE futi në burg burra e gra për të shpërblyer mikun e Ramës

PD ka vijuar sot me denoncimin e tenderit të OSHEE-së. Sipas deputetit të kësaj partie Gent Strazimiri, OSHEE futi në burg burra e gra për të shpërblyer mikun e Ramës.
“Prej më se dy vitesh, Partia Demokratike ka denoncuar terrorin dhe padrejtësinë që ka shoqëruar të ashtuquajturën fushatë për të mbledhur paratë e humbura të OSHE. Përgjigja ishte e njëjta ‘paratë do të shkojnë për investime në rrjet, përmirësimin e furnizimit…’, etj.
Tani u mësua pse OSHEE torturoi mijëra familje, futi në burg kryefamiljarë, burra e gra, la në  errësirë invalidë, të sëmurë e të porsalindur dhe u mori jetën Qamil Zelës, Llazi Nasit, Gjovalin Lazrit dhe Arif Dodës.
Këto akte çnjerëzore shërbyen ne fakt për të mbledhur miliarda lekë qe te shpërblehej miku, ortaku e klienti i Edi Ramës, ndërtuesi i sarajeve të tij në Surrel.
Paratë e gjakut të marra me kërbaç, kryehajduti dhe OSHEE, nuk i paska dashur për interesa publike aspak.
Por për të ndarë tortën e majme për Carapulët, siç Partia Demokratike e kishte paralajmëruar.
I gjithë ky abuzim është kryer me paramendim, sepse kemi një fitues të paracaktuar.
Kur Partia Demokratike denoncoi me 11 shtator tenderin, kasneci i Ramës reagoi dhe shprehu habi të madhe, se “nga e di opozita se kush i merr paratë pa u shpallur fituesi”.
Po ja që fituesi u shpall, dhe u shpall ai që ishte paracaktuar, miku, ortaku, ndërtuesi i Ramës.
Me ofertën më të lartë. 500 mijë euro me shumë se ofertuesi i dytë.
Po si mund të ndodhë kjo?
Kjo ndodh sepse nuk ka me garë dhe shqyrtim ofertash.
Tenderat i drejton Edi Rama, i menaxhon Edi Rama, i ndan Edi Rama me miqtë e tij.
Ky është kriteri, ky është urdhëri.
Ky është vetëm një nga rastet kur Carapuli i Ramës ka nxjerrë paratë e “pajës” që dha për kryeministrin kur i bëri sarajet luksoze në Surrel.
Korrupsion skandaloz, zhvatje e mynxyrshme e parave të shqiptarëve, para që kryehajduti i OSHEE i mblodhi me dhunë, me burg, me ndëshkime kolektive, me marrje jete.
Partia Demokratike i siguron qytetarët e vendit se kryehajduti i OSHEE, Adrian Çela dhe banda e tij që tallet me paratë e gjakut të shqiptarëve, do të mbajë përgjegjësi deri më një. Dita e llogarive para ligjit do të vijë shpejt”, u shpreh Strazimiri.