Politikë mbi arkivolin e komandant Gjetajt, Rama, Meta dhe Tahiri ripremtojnë reformë në Drejtësi

Në mënyrë të përsëritur, drejtues të mazhorancës kanë ripërsëritur premtimin për reformë në Drejtësi. Por këtë herë premtimi, si rrallë ndonjë herë, është bërë mbi trupin e pa jetë të një oficeri policie.
Fillimisht ka qenë ministri i brendshëm Saimir Tahiri, i cili ka tentuar të vërë shenjë barazimi midis “të arratisurit” nga psikiatriku Ruzhdi Arishtës, autorit të vrasjes së komandanit të FNSH-së, dhe “të liruarve” nga gjykata, elementë e kriminalë me precedentë penalë. Pas kësaj “baraspeshe”, kaq ka dashur Saimir Tahiri, për t’ju kundërvënë gjyqtarëve që lirojnë elementët kriminalë dhe që, sipas tij, reforma në Drejtësi, do tua heqë këtë mundësi.
“Një nga njollat e zeza të vendi tonë, më shumë se sa krimi rrugës është drejtësia dhe reforma e këtij sistemi do ti jap ndëshkimin e duhur, krimit të rrugës dhe gjykatësve, që me çekiçin e tyre motivojnë krimin e rrugës”, u shpreh Tahiri.
Nuk ka mbetur më pas edhe kryeparlamentari Ilir Meta. Për hir të së vërtetës, duhet pranuar e pohuar se Meta,në fjalën e tij gjatë homazheve, nuk harroi që formalisht ti ngushëllonte familjarët e oficerit të vrarë të policisë, duke shtuar edhe ky premtimin për “garancinë e reformës në drejtësi”.
“Garantojmë që reforma në drejtësi do bëhet dhe kriminelët do të shkojnë aty  ku  meritojnë”, u shpreh Meta.
Edhe kryeministri Edi Rama, “për ti dhënë një dorë” ministrtt tij të brendshëm të përfolur edhe “ndërkombëtarisht” për përfshirje në afera të paligjshme trafiqesh, indirekt duke vlerësuar punën e policisë, nuk e ka fshehur “krenarinë” për ministrin Saimir Tahiri. Natyrisht, në fjalën e tij, edhe kryeministri nuk kishte se si të mos evidentonte “rëndësinë e reformës ndaj gjyqtarë të armatosur me çekiçë dhe shkëputjes së fijeve të krimit me gjyqësorin”.