Ka vijuar debati mes Presidencës dhe Ministrisë së Jashtme për lirimin e ambasadorit shqiptar në OSBE. Pas deklaratës së sotme te ministrisë së Jashtme lidhur me mbarimin e mandatit të ambasadorit tonë në OSBE, Spiro Koçi ka reaguar edhe Presidenca.
Ato cfarë deklaron ministria e Jashtme në deklaratën e saj nuk janë të vërteta, sipas një burimi nga ky institucion. “Lidhur me reagimin e sotëm te MPJ-së, mund të themi se ata gënjejnë, pasi Spiro Koçi është zhdekretuar nga Presidenti Topi më 30 korrik 2008, dhe është emëruar në MPJ më 28 gusht 2008, dhe jo si thonë se nga Serbia është kthyer po njësoj si tani”, citon këtë burim panorama.
“Është e vërtetë që Presidenti i ka firmosur të gjitha lirimet nga detyra të atyre ambasadorëve, madje, ambasadorja e Kanadasë kishte gati 6 vjet në detyrë dhe Qeveria u kujtua për të para dy muajsh.
Por për asnjë nga këto vende ajo nuk ka sjellë propozimet për emrat e rinj, përfshirë edhe atë të Vatikanit.
Në gati gjysmën e ambasadave shqiptare në vendet e huaja, diplomacinë po e bëjnë ‘të ngarkuarit me punë’. Tashmë nuk e kemi luksin që të caktojmë një të ngarkuar me punë edhe në OSBE. Presidenti do ta firmoste menjëherë kandidaturën e përshtatshme atje”, vijoi burimi.
Në deklaratën e Ministrisë së Jashtme shkruhej se “Presidenti i Republikës vijon të ketë një qasje selektive dhe qartësisht politike ndaj propozimeve për emërimin dhe lirimin e ambasadorëve. Kujtojmë se që nga koha e propozimit për lirimin e Spiro Kocit, Presidenti ka liruar ambasadorët në Japoni, Hungari, Sllovaki, Brazil dhe Kanada”, shkruan deklarata e Ministrisë së Jashtme.
“Spiro Koçi ka 5 vjet që është emëruar ambasador, ndërsa ligji i shërbimit të jashtëm parashikon që kohëzgjatja në detyrë të jetë 3 vjet. Procedura e lirimit të një ambasadori, në bazë të nenit 26, pika 2 të ligjit nr. 23/2015, iniciohet nga Kryeministri. Pas propozimit të Kryeministrit, Presidenti ka jo më shumë se 30 ditë për ta liruar ambasadorin. Koçi është dekretuar Ambasador i Shqipërisë pranë OSBE-së dhe Organizatave të tjera Ndërkombëtare në Vjenë (UNOV) në 28.09.2010 (Dekreti nr. 6693). Pra ka plot 5 vite në këtë detyre”, shkruan deklarata.
Po kështu, Ministria e Jashtme thekson se vetë Spiro Koçi është i vetëdijshëm për përfundimin e mandatit, madje i ka dërguar edhe një e-mail këtij institucioni në vjeshtën e vitit 2014, ku kërkonte emërimin si ambasador diku gjetkë.
