Kukës, Basha në familjen e 23-vjeçares që u aksidentua në Gjermani: Dramë dhe tragjedi kombëtare

Lideri i opozitës, Lulzim Basha ka qenë sot në Kukës ku ka ngushëlluar familjen Haziraj, për humbjen e jetës së vajzës së tyre, nga një aksident tragjik në Gjermani.
Pasi ka ngushëlluar familjarët, Basha në një deklaratë për mediat tha se kjo është një tragjedi e dramë kombëtare, ndërkohë që shkaktarët e saj i ka pllakosur heshtja.
Ai shtoi se mijëra shqiptarë janë larguar nga vendi pasi mungon shpresa për një të ardhme më të mirë, mungojnë vendet e punës, mungojnë mundësitë që të rinjtë të ecin përpara.
Basha shtoi se ndonëse kancelaritë europiane po kërkojnë reagim, qeveria, sipas tij, nuk flet e as nuk reagon, ndonëse e di që është shkaktare e kësaj situatë të krijuar në vendin tonë.
Ai ka bërë apel që shqiptarët të mbështesin njëri-tjetrin, në këtë krizë që ka përfshirë gjithsecilin, por kjo krizë kërkon reagim kombëtar.
Në ngushëllimin që Basha bëri në familjen Haziraj, shoqërohej nga dy deputetët e djathtë të qarkut Kukës, Flamur Noka e Alban Zeneli si dhe kryebashkiaku, Bashkim Shehu.
Familja Haziraj, vetëm një ditë më parë i dha lamtumirën e fundit vajzës 23 vjeçare që humbi jetën tragjikisht, teksa shpresonte të përfitonte azilin ekonomik në Gjermani.