SHPËRTHIMI TE “DON BOSKO”/ Prokuroria zbardh dinamikën që provokoi shpërthimin

Prokuroria e Tiranës ka bërë publike sot disa të dhëna paraprake lidhur me ngjarjen e dy ditëve më parë në “Don Bosko”, ku si pasojë e shpërthimit të bombolës së gazit në një ëmbëltore mbetën të plagosur disa persona.
Sipas prokurorisë, mësohet se, në datën 09. 08. 2015, në orën 18:35, në vendin e quajtur rruga “Don Bosko”, në ambientet e lokalit “Bar Kafe Ëmbëltore” , të administruar nga ana e shtetasit Avdulla Dervishi, ka ndodhur një shpërthim gazi nga e cila, kanë mbetur të dëmtuar dhe plagosur disa klientë, personeli shërbimi, klientë e kalimtarë të rastësishëm si dhe banorë të ambienteve përreth. Nga shpërthimi i janë dëmtuar edhe disa ambiente banesash e biznese përreth vendit të ngjarjes duke ju shkaktuar dëmtime të xhamave të fasadave të dyerve, dritareve si dhe në ambientet e brendshme të biznesit përreth lokalit “Bar Kafe Ëmbëltore”.
Nga ana e punonjësve te policisë të Komisariatit të Policisë nr. 3, Tiranë, pas marrjes dijeni për ngjarjen, në bashkëpunim me forcat e Zjarrfikëses, shërbimin e urgjencës spitalore, është bërë evakuimi i banoreve si dhe është dhënë ndihma mjekësore e personave të dëmtuar dhe të plagosur nga shpërthimi i këtij lokali.
Nga ana e policisë gjyqësore në bashkëpunim me ekspertet kriminalist, ekspertet xheniere dhe ai PMNZSH, është bërë kryerja e vendit të ngjarjes, në të cilën u konstatua se lokali ëmbëltore “Kamela“, ishte i shkatërruar, dyert dritaret e saj ishin të hequra dhe të thyera, materiale të pastiçerisë, pajisje të saj ishin të shpërndara dhe të hedhura në mënyrë të çrregullt në ambientin e lokalit dhe jashtë saj, janë konstatuar 6 (gjashtë) bombola gazi të pa shpërthyera të përmasave të ndryshme, ngjitur me murin e këtij lokali shihen dy soba gazi gatimi, pranë tyre shihen tuba impianti të shpërndarjes së gazit, muret janë të veshura me blozë. Në distancën 2 m nga ana veriore u fiksua vatra e shpërthimit, pasi shihen mbetje djegie. Gjithashtu në disa biznese dha banesa, si dhe disa ambiente të tjera banimi ku ndodhi shpërthimi, shihet shkatërrimi i dyerve, dritareve.
Nga deklarimet e deritanishme të personave të ndryshëm, të cilët kanë qenë në lokal në momentin e shpërthimit, rreth orën 18.30 të datë 09. 08. 2015, rezulton se shtetasi Avdulla Dervishi ka thirrur me zë të lartë që të ulin automatet pasi po çlirohej gaz.
Një nga punonjësit e lokalit ka tentuar të hapur me dorë rubinetin e bombolës, por meqenëse nuk ka mundur që ta hapë, i ka kërkuar ndihmë pronarit Avdullait që ta hapë atë. Pasi Avdullai ka shkuar dhe është munduar që ta hapë bombolën e gazit, është ndjerë rrjedhje gazi. Pas pak momentesh, Avdullai ka thirrur që të uleshin automatet e rrjetit elektrik. Në këtë moment ka ndodhur edhe shpërthimi.
Është kërkuar kryerja e ekspertimeve mjeko – ligjore për personat e dëmtuar, si dhe është bërë vendim për kryerjen e ekspertimit teknik të zjarrit dhe ai biologjik, saktëson prokuroria.