Rrëfimi i Emma-s për mediat e huaja, si u mashtrua dhe shfrytëzua si prostitutë nga i dashuri

U arratis nga familja me të dashurin dhe përfundoi në rrugë si prostitutë. E dhimbshme historia e vajzës shqiptare, e cila thirret Emma dhe pse nuk është ky emri i saj i vërtetë. Ajo ka dëshmuar ferrin në një intervistë për prestigjiozen BBC. Tregon si u gënjye nga i dashuri i saj për një jetë më të mirë jashtë vendit, i cili më pas, ai iu bë makthi I saj.
“Punoja si parukiere, aty njoha një djalë. Më fliste për një agjenci modelingu ku unë mund të punoja. Zgjodha të arratisem. Ika me të dhe aty filloi gjithçka. Hipa në kamion dhe kam udhëtuar tre ditë pa e ditur se ku do të shkoja saktësisht. Ne kamion kisha vetëm ujë. Ndieja sikur do të vdisja”,  rrëfen Emma.
Nuk mund ta denonconte të dashurin pasi ai kishte miq në polici dhe nuk kishte besim se do të ndihmohej.
Më pas vajza tregon se si kishte qëndruar në Gjermani me dokumente false ku dhe filloi të ushtronte prostitucion në rrugë.
Gjatë intervistës tregon se e kishte të pamundur të largohej, pasi gjithmonë ishte nën ruajtje.
“Nuk mund të ikja pasi isha gjithmonë e kyçur. Gjithmonë ishte dikush pranë meje. Mendoja shpesh herë të largohesha por e kisha të pamundur. Kisha frikë se ata do I bënin keq familjes sime”, tregon ajo.
Ajo dërgohej dhe në Itali ku e priste i njëjti ferr, prostitucion i detyruar. Mes lotësh tregon dhe momentin kur është kapur në shtëpi nga policia italiane, dërgimin në Shqipëri dhe refuzimin e familjes.
“Në Itali më kapën teksa isha në shtëpinë ku jetoja. Më kthyen në Shqipëri. Kur shkova, familja nuk më pranoi”, thotë Emma.
Emma tashmë ndodhet në Britani dhe ndihet tepër e sigurte, megjithëse shprehet se e ka të vështirë të heqë nga mëndja ferrin e përjetuar.