KLSH ka kallëzuar penalisht zyrtarin nr.2 të ministrisë së Arsimit Plarent Ndreca, drejtorin juridik të kësaj ministrie si dhe shefin e financës pas një auditimi që ka zhvilluar në ministrinë e Arsimit dhe të Sportit.
Sipas kontrollit, zyrtarët e lartë kanë kryer shkelje në procedurat e prokurimit duke shkaktuar dëm ekonomik në Buxhetin e Shtetit në masën 108 milion lekë ose 771,000 euro.
Ndërkaq bllokimi për gati 3 vjet i kuotave për doktoraturat në institucionet arsimit të lartë publik, ka sjellë orientimin e fondeve vetëm në një universitet privat.
Lidhur me bllokimin doktoraturave në universitetet publike, KLSH konstaton njëanshmëri dhe klientelizëm të qeverisë për një universitet privat, të cilit nuk ia përmend emrin por që merret me mend. “ Pavarësisht se vlerësojmë si ndërhyrje të domosdoshme bllokimin e regjistrimeve në ciklin e tretë të studimeve për sa kohë që nuk është bërë akreditimi institucional, bllokimi pjesor i kuotave vetëm për universitete publike ka çuar efektivisht në orientimin e kërkesës vetëm drejt një Institucioni privat të Arsimit të Lartë në vend”, thekson kontrolli.
Kështu nga një llogaritje e thjeshtë (nisur nga një tarifë minimale prej 204,000 lekë, me një numër minimal kuotash 300), buxhetit të Institucioneve Publike të Arsimit të Lartë i mungojnë 600 milionë lekë ose 450 mijë euro.
Ndërkohë që janë gjetur shkelje në prokurime me vlera të larta sic është rasti i ndërtimit të Tirana Olimpic Park ku si pasojë e shkeljeve ligjore, është shkaktuar dëm ekonomik në Buxhetin e Shtetit në masën 780 milionë lekë ose 562,000 Euro).
Në procedurën e prokurimit me objekt “Blerje pajisje mobilierie për shkollat e sistemit arsimor pasuniversitar” për shkak të shkeljes së ligjit është shkaktuar dëm ekonomik në Buxhetin e Shtetit në masën 29 milionë lekë ose 209,000 euro.
