Parlamenti shqiptar 1 minut heshtje për masakrën e Srebrenicës

Ish-kryeministri Sali Berisha, ka ftuar sot deputetët e Kuvendit të Shqipërisë të Mbajnë një minutë heshtje në përkujtim të masakrës dhe viktimave të Srebrenicës.
“Genocidi i Serbrenicës ku të rrethuar nga forcat serbe nën mbrojtjen e plotë të OKB në një kamp të OKB u grinë nga barbarët e këtij rajoni 8 mijë burra, gra, dhe fëmijë vetëm e vetëm se i përkisnin besimit myslimane. Genocidi i Serbrenicës është ngjarja më e turpshme, më tragjike në historinë e Pas Luftës së Dytë Botërore. Është ngjarja më e turpshme në historinë e Kombeve të Bashkuara që nuk arritën të mbrojnë nga mizoria serbe njerëzit që strehonin në kampin e tyre”, u shpreh Berisha.
Më tej ai renditi masakrat që ka kaluar në kurriz populli shqiptar.
“Ne shqiptarët jemi një komb i cili po të shohim mbrapa shekullin që shkoi na del që ai ishte një shekull gjenocidesh për ne. Ne e nisëm shekullin me njërin prej gjenocideve më të shëmtuara të realizuar ajo që quhet tragjedia e Kumanovës ku hordhitë serbe mbushën me koka shqiptarësh Vardarin dhe territorin shqiptar në Maqedoni. Por shqiptarët përjetuan një gjenocid të dytë. Në përfundim të Luftës së Dytë Botërore është gjenocidi i Tivarit. Bashkëpunim i Enver Hoxhës me Titon. Çdo familje shqiptare nën platformën se këta nuk u vranë në luftë dhe ne duhet ti vrasim që ti pakësojmë ju mor nga një djalë. Nga Kukësi deri në Tivar i grinë dhe i korrën kudo mitralozat e Enver Hoxhës, të terroristëve shqiptarë, të Rankoviçit dhe Titos. Por shqiptarët nuk përjetuan vetëm këto dy gjenocide. Përjetuan një gjenocid të vërtetë nga diktatura komuniste. Kampet e përqendrimit ishin si furrat e gazit për shqiptarët. Sot është një ditë solidariteti me popullin e Bosnjës. Është një ditë në të cilën duhet të dënojmë me ashpërsinë më të madhe barbarinë e Serbrenicës. Të dënojmë qëndrimin e Putin, këtij ‘Hitleri të ri’. Për të nderuar viktimat e Serbrenicës ju ftoj të mbajmë një minutë heshtje për ta. Kemi nderuar shpirtin e tyre të pafajshëm”, u shpreh Berisha.
Trupat serbe të Bosnjës dhe paramilitarët serbë, më 11 korrik 1995 vranë afro 8.000 burra dhe djem myslimanë në masakrën, që nga gjykatat ndërkombëtare cilësohet si gjenocid.
Bosnje Hercegovina po përgatitet që të shënojë 20 vjetorin e vrasjeve, ndërkaq viktima të reja të masakrës janë akoma duke u gjetur nëpër varre masive.
Deri më tani rreth 7.000 mijë viktima janë zhvarrosur nga 93 varre masive.