Imami i Xhamisë së Lazaratit: Nuk ka grupe që stërviten, ISIS armik i Islamit

Imami i Xhamisë së Lazaratit, Gentian Pollo ka dhënë një intervistë ekskluzive për gazetarin e News24, Spartak Koka, ku u ka bërë thirrje personave që janë në kërkim të dorëzohen. Imami Pollo ka mohuar kategorikisht se në Lazarat ka grupe terroriste që stërviten. Ai tha se në Lazarat praktikohet feja islame e pastër, larg çdo grupacioni radikal, duke theksuar me forcë se ISIS është armik i Islamit dhe fesë myslimane. Imami Pollo, u shpreh i indinjuar për vrasjen e efektivit të RENEA-s, të cilin e cilësoi vëlla.
“Falënderoj Allahun që më mundësoi të merrem me këtë fe të pastër dhe që ka shtuar radhët tona. Jemi tronditur shumë për ngjarjet e fundit, për vrasjen e vëllait tonë besimtar prej njerëzve që nuk e dimë se çfarë janë ata dhe çfarë duan të tregojnë me këtë. Jam totalisht i indinjuar me disa media që shkruajnë se në Lazarat por stërviten grupe të ISIS. Në Lazarat ka besimtarë që trajtojnë thirrjen për tek Allahu për tek e vërteta. ISIS është armiku i Islamit, i myslimanëve në radhë të parë pastaj i atyre me të cilët luftojnë. Në Lazarat nuk ka asnjë lloj grupi që stërvitet”, tha Imami i Lazaratit.
Lidhur me numrin e besimtarëve myslimanë në Lazarat, Imami tha se ka ardhur në rritje që pas aksionit para një viti, ku u asgjësuan të gjitha parcelat me hashash. Ai tha se Xhamia e Lazaratit praktikon Islamin e pastër.
“Deri para një viti kur ka qenë hashashi ka pasur besimtarë por të larguar për shkak të këtij sherrit. Besimtarët dita-dita shtohen. Kemi bërë detyrën tonë, i kemi thirrur tek e vërteta, të duan Allahun, respektojnë prindërit të mbajnë lidhjet farefisnore. Ne nuk kemi lidhje me ISIS se na kanë pyetur për këto grupe radikale. Ne praktikojmë Islamin e pastër larg këtyre grupacioneve. E dënojmë jashtëzakonisht ngjarjen e djeshme. Ne duam rend, duam qetësi, duam punë. Duam që njerëzit të mendojnë për jetën e tyre për familjen e tyre”, ka theksuar Imami Pollo.
Ai ka folur edhe për prirjet radikale, ekstremiste të personave të shpallur në kërkim nga policia për sulmin ndaj bluve. Pollo tha se i njeh por nuk kanë lidhje me fenë islame.
“I njohim se janë fshatarët tanë. Në të vërtetë e kam thënë edhe diku tjetër. Kam shkuar edhe në polici. Ata janë adoleshentë mund të jenë nën efektin e drogës a ku di unë. Këtu vijnë shumë njerëz. Na përshëndesim, i përshëndesim e pastaj ikin. Duam praktikimin e fesë së pastër. Ndërsa ata që bëjnë vepra të ndaluara, thyejnë rregullat e shtetit ne jemi kundër”, tha Imami i Lazaratit.