Gruaja e mësuesit të Divjakës: Po e ka bërë Demiri, të dënohet dhe të na lërë të qetë

Bashkëshortja e Demir Hoxhës është anëtari i familjes së tij që duket më e tronditura nga abuzimi seksual për të cilin akuzohet i shoqi. Mes ngashërimeve, ajo ka arritur të thotë vetëm pak fjalë për gazetën “Shqip”, duke i bërë apel Demirit që të thotë të vërtetën.
“Nuk kam ç’të them! Nuk dal dot as jashtë në oborr. Më vjen turp nga ç’po dëgjoj! Nëse Demiri e ka bërë diçka të tillë, ta pranojë e të ma thotë në sy! Nëse e ka bërë, të dënohet sa e meriton dhe të më lërë të kujdesem vetë për fëmijët. Nëse është i pastër dhe nuk ka gisht në gjithë këtë histori, duhet të zbardhet e vërteta sa më shpejt”, është shprehur ajo.
Ndërkohë, dy djemtë e Demirit, Redjani, 26 vjeç dhe Oldjani 19 vjeç, duken të hutuar nga situata e krijuar.
Me sy të përlotur ata deklarojnë se nuk kanë pasur kurrë probleme dhe konflikte me familjen e vajzës, madje, shtojnë se babai i tyre, jo rrallëherë kishte pirë kafe me babanë e vajzës, çka tregonte për marrëdhëniet e mira që ekzistonin midis tyre.
“Të thuash që është e vërtetë apo dhe të duash ta mendosh në një moment, qoftë edhe për një person që nuk e njeh fare, mjaft që të dish moshën 62 vjeç, është jashtë çdo logjike. Unë nuk e besoj kurrë se im atë e ka bërë një gjë të tillë. Unë e njoh babanë tim dhe nuk e di pse duhej të stisej e gjitha kjo. Vetëm po ta dëgjoj nga goja e tij do ta besoj. Kërkojmë drejtësi, kërkojmë që kjo çështje të zbardhet sa më parë”, është shprehur Redjani, një nga djemtë e Demir Hoxhës.
Edhe kunati i të arrestuarit, Xhevdet Llapushi, e ka cilësuar si të pabesueshme atë ç’kanë dëgjuar.
“Është një ngjarje që na ka shokuar të gjithëve, jo vetëm ne të afërmve të tij, por të gjithë opinionin që e ka dëgjuar këtë ngjarje të paprecedentë. Është absurde dhe as që mund ta imagjinosh që një veprim të tillë ta ketë kryer Demiri”, ka pohuar Xhevdeti.