Në një intervistë që Presidenti Nishani dha në emisionin “Pasqyra elektorale” të Agon Channel, me gazetaren Sonila Meço dhe analistët Fatos Lubonja dhe Andi Bejtja, ai ka deklaruar se financimi i partive politike në Shqipëri është i dyshimtë. “Vazhdon të mbetet jashtëzakonisht shqetësuese jo vetëm çështja e financimit nga disa njerëz që nuk kanë lidhje të drejtpërdrejta me partitë politike, me strukturat e tyre politike, por edhe burimi i parave të tyre, pra i resurseve financiare që janë jo vetëm të padeklaruara, janë jo vetëm të paqarta por që jam i bindur që po të hetohet në thellësi gjendet edhe burimi i këtyre parave të papastra që i vijnë politikës. Pra , unë besoj që duke i nisur nga rastet evidente, nga individët të cilët rekordet i kanë publike do të shkohet pastaj edhe në raste të tjera edhe më të sofistikuara”, deklaroi Presidenti Nishani. “Unë personalisht do të jem në një kontakt të vazhdueshëm, edhe nxitës mbi institucionet, veçanërisht mbi prokurorinë e shtetit, mbi policinë e shtetit në mënyrë të tillë që çdo informacion që disponohet brenda institucioneve shqiptare edhe për shkak të partneritetit me partnerët e tjerë të bëhet publik, dhe në rast se këto institucioneve nuk do ta kenë kurajon t’i bëjnë publike do të jetë Presidenti i Republikës që do t’i bëjë publike dhe do t’i denoncojë”, tha ai në lidhje me denoncimin e rasteve të financimit në të zezë të partive apo inkriminimit të njerëzve të politikës.
