Kosova jashtë marrëveshjes Shqipëri – Serbi për ndërtimin e autostradës Durrës – Nish?!

Brenda 15 ditësh, Kryeministri i Shqipërisë Edi Rama dhe ai i Serbisë, Alexandar Vucic pritet të nënshkruajnë protokollin për ndërtimin e autostradës Durrës – Nish, e cila kalon edhe nëpër Prishtinë.
Udhëheqësit e dy vendeve fqinjë të Kosovës nuk e kanë përmendur fare përfshirjen e liderëve të Kosovës në këtë marrëveshje, e cila Serbisë i siguron dalje në det.
Para kësaj marrëveshje, Hashim Thaçi, kur ishte Kryeministër kishte arritur marrëveshje me Kryeministrin e atëhershëm të Serbisë, Ivica Dacic, për lidhjen e autostradës së Kosovës me atë të Serbisë. Por, duket se marrëveshja e fundit mes Shqipërisë dhe Serbisë e ka lënë krejt anash marrëveshjen e mëhershme të Prishtinës dhe Beogradit.
Në kuadër të dialogut Kosovë – Serbi, Baronesha Ashton pati konfirmuar arritjen e marrëveshjes mes dy vendeve për lidhjen e autostradës së Prishtinë – Nish.
Isa Mustafa në fjalimin e tij gjatë pjesëmarrjes në Forumin Ekonomik të Vjenës, që u mbajt në Tiranë, ka thënë se Kosova dëshiron të lidhet me Serbinë me autostradë.
Nënshkrimi i këtij protokolli midis Serbisë e Shqipërisë, për autostradën Durrës – Nish midis kryeministrave të Shqipërisë dhe Serbisë Edi Rama dhe Alexandar Vucic brenda 15 ditësh, e konfirmoi Ministrja serbe e Infrastruktrës Zorana Mihajlovic.
Ajo ka thënë se projekti i autostradës Nish – Merdare – Prishtinë – Tiranë – Durrës do të kushtojë rreth 1 miliardë euro
Ajo ka theksuar se kjo autostradë do të jetë e rëndësishme sepse e lidhë rajonin, veçmas për Serbinë e cila do të sigurojë dalje në det nëpërmjet Shqipërisë. Ajo ka thënë gjithashtu se stabiliteti politik është kusht për realizimin e këtij projekti.