Barcelona – Juventus, finalja e Champions League, “Zonja e vjetër” eliminon Realin në “Bernabeu”

Barcelona-Juventus, finalja e Champions League, bardhezinjtë eliminojnë Realin në “Bernabeu”
Juventusi rikthehet pas 12 viteve në finale të Champions League. Italianët barazuan 1-1 ndaj Realit në “Bernabeu” dhe u kualifikua pasi kishte fituar 2-1 në Torino.
Heroi i bardhezinjëve ishte një ish-madrilen, Alvaro Morata, i cili shënoi golin e barazimit, ndërkohë që kishte shënuar edhe në ndeshjen e parë në Torino.
Reali e nisi ndeshjen në sulm ku Ronaldo, Bale dhe i rikthyeri Benzema kërkuan të shënojnë që në minutat e para, por Juventusi ishte i vendosur mirë në mbrojtje dhe madje me anë të kundërsulmeve u paraqit dy herë rrezikshëm në portën e Casillas. Megjithatë goli për vendasit nuk vonoi dhe në minutën e 23-të kolumbiani Rodriguez fitoi një 11-metërsh, të cilin e ktheu në gol i përhershmi Ronaldo. Pjesa e parë përfundoi me rezultatin 1-0.
Në 45 minutat e dyta bardhezinjtë, të cilëve i nevojitej patjetër një gol për t’u kualifikuar, morën iniciativën të parët dhe në minutën e 57-të Morata shënoi golin që i dha kualifikimin juventinëve, pasi vendasit nuk arritën të shënonin sërish dhe rezultati përfundimtar i ndeshjes ishte 1-1.
Finalja e këtij edicioni në Champions League, Barcelona – Juventus, do të luhet më 6 qershor në Berlin.