Basha në Elbasan, prezanton Turkun: Qazim Sejdini do të paguajë për dyshen Rama-Meta

Nga qyteti i Elbasanit ku prezantoi kandidatin Ardian Turku kryetari i PD-së Lulzim Basha vijoi akuzat ndaj qeverisë Rama-Meta, se i ka vënë “kazmën vendit dhe nuk ka bërë asgjë për njerëzit”
“Qytetarë e shohin ikjen nga vendi si të vetmen shpresë. Dyshja Rama-Meta me votën e qytetarëve kërkon të sanksionojë rritjen e taksave. Kërkon votën për të hequr 10 mijë qytetarë nga administrate, tha Basha duke nënvizuar se 21 qershori do të jetë, gjykata më e madhe për shumicën. Më 21 qershor të djathtë e të majtë do bashkohen kundër mashtrimit”.
Kreu i PD-së u shpreh se shqiptarët po vuajnë pasojat e keqqeverisjes së dyshes Rama-Meta Qazim Sejdini do të paguajë për dështimet e kësaj dyshe.
“Rruga Tiranë­Elbasan ka vite që nuk përfundon. Qytetarët duan të ikin, janë rritur taksat dhe çmimet. Ne nuk jemi dele, këta premtuam 300 mijë vende pune. Sejdini do të vijojë të paguajë për dyshen Rama-Meta”, tha Basha.
Në Librazhd, Basha duke prezantuar Fadil Brazhdën deklaroi se dëshpërimi i shqiptarëve është i madh. Kryedemokrati ka qenë edhe në Prrenjas ku është takuar me banorët dhe ka prezantuar kandidatin për këtë bashki, Bajazit Karriqi. Kreu i PD-së tha se Karriqi do të garojë përballë deputetes Miranda Rira të LSI-së, e cila sipas tij nuk pati kurajë të thoshte jo rritjes së taksave si pjesë e mazhorancës.
Partia Demokratike ka zyrtarizuar sot kandidatin e saj për Bashkinë Bulqizë për zgjedhjet e 21 qershorit. Durim Balla është kandidati që PD do të shkojë në zgjedhjet e ardhshme lokale.