Francë, 150 azilkërkues shqiptarë protestë kundër vuajtjeve dhe në kërkim të një strehe

Ndërsa e gjithë vëmendja është përqendruar në Gjermani për shkak të rritjes drastike të numrit të shqiptarëve që kanë emigruar në këtë shtet në kërkim të azilit politik, ky fenomen pothuajse në këto përmasa është edhe në Francë.
Një numër prej 150 shqiptarësh po kalojnë peripeci nga më të vështirat në Lion të Francës, të mbërritur me shpresën për një jetë më të mirë.
Fillimisht ata ishin akomoduar ilegalisht në një pallat në pronësi te forcave ushtarake. Me 14 prill ata janë nxjerrë jashtë me forcë nga xhandarmeria franceze. Të gjendur në këtë situatë, pa një strehë mbi kokë, në ndihmë ju ka ardhur një staf nga katedralja më e madhe në Lion, Saint-Just, ku Krypeshkopi ka dhënë urdhër qe ti ndihmojnë shqiptarët.
Sipas të njëjtit burim, azilantët shqiptarë e kanë kaluar natën e 14 prillit pranë katedrales, ne stola parku mbuluar me çfarë kanë mundur të sigurojnë. Në mesin e shqiptarëve gjenden, gra, burra, pleq, fëmijë, foshnje, njerëz të sëmurë, mes tyre edhe të paralizuar. Pas kalimit të natës në park, në temperatura aspak të favorshme, me 15 prill ata do të sistemoheshin në një palestër shkolle, 100 metra larg katedrales, ku kanë qëndruar për 6 ditë me radhë.
Edhe këtu jetesa e tyre nuk ka qenë aspak e lehtë, ku kanë fjetur në tokë dhe me ditë të tëra pa ushqim.
Më pas, 150 shqiptarët janë nxjerrë dhe nga palestra, për tu akomoduar në një tjetër sallë, 10 km larg nga palestra, ku mësohet se do të qëndrojnë deri më 31 maj. Ambienti është i pistë dhe nuk përmbush as 20 për qind nevoja jetese.
Ndërkohë në mbështetje të tyre, dje një grup shqiptarësh manifestuan pranë Prefekturës në Lion. Dhjetëra të rinj kërkuan gjetjen e një zgjidhje për këta qytetarë shqiptarë.
Mësohet se xhandarmëria franceze është sjellë keq me protestuesit, duke shoqëruar një pjesë të tyre në polici. Protesta u përcoll masivisht edhe nga media franceze.