“Fast and Furious 7” tejkalon çdo parashikim, grumbullon 143.6 milionë dollarë që në fundjavën e parë

Filmi i fundit nga seria e “Fast and Furious” ka arritur në krye të filmave më të ndjekur në kinematë amerikane dhe kanadeze duke fituar jo më pak se 143.6 milionë dollarë që në fundjavën e parë të shfaqjes.
Ky është debutimi më i mirë i ndonjë filmi në muajin prill, duke tejkaluar “Captain America: The Winter Soldier” i cili kishte debutuar me 95 milionë dollarë fitime.
Me këto të ardhura, “Fast and Furious 7” zë vendin e nëntë nga top dhjetëshja e filmave me premierat më të suksesshme në histori.
Interesimi i madh është shtuar edhe me dëshirën të shohin aktorin Paul Walker në rolin e tij të fundit.
Walker, një nga protagonistët e “Fast and Furious 7”, vdiq në vitin 2013 në një aksident me veturë në moshën 40 vjeçare, ndërsa filmi nuk ishte përfunduar ende.
Fitimet prej mbi 143.6 milionë dollarë, është shuma e fituar vetëm në Amerikën veriore, ndërsa ende nuk janë publikuar të dhënat e fitimeve nga kinematë e shteteve të tjera. Filmi momentalisht është duke u shfaqur në 10 500 kinema në 63 territore të botës.